Хоразмнинг Гурлан туманида Ўзбекистон президенти шарафига Шавкат, Миромон ва Мирзиё деб исм қўйилган эгизакларнинг бобоси неваралари дунёга келганидан бир ой ўтиб ҳам ҳокимият ва президент маъмуриятидан бу оилага жиддий эътибор қаратилмаётганидан шикоят қилди.
Бу шикоятга муносабат билдирган Ўзбекистон Меҳнат ва аҳолини ижтимоий муҳофаза қилиш вазирлиги мулозими ёрдам ҳаммага бирдай берилиши кераклигини айтди. "Бу президентнинг исмини қўйибди, ёрдам бериш керак, деган гап йўқ. Мамлакат қонунчилигига кўра, ҳар бир янги туғилган болага икки ёшгача ота-онасини даромадидан келиб чиқиб моддий ёрдам берилади", - деди у.
Эгизакларнинг бобоси кўра¸ Шавкат, Миромон ва Мирзиеёларнинг отаси ҳозирги пайтда ишсиз ва оилада икки яшар ўғил фарзанд устига бирваракайига уч чақалоқ туғилиши уларни ҳукумат кўмагига муҳтож қилиб қўйган.
Ўзбекистонда Ислом Каримов президент бўлган даврларда эса янги туғилган эгизакларга Ислом, Карим, Абдуғани исмларини қўйиш урф бўлганди. Аваллари туғилган чақалоқларнинг исмлари Ислом, Карим ва Абдуғани деб қўйилса, маҳаллий ҳукумат томонидан бешик, аравача ва пул совға қилинар эди.