Ссылки доступа

Ӯзбекистон дар сохтмони нерӯгоҳи Қамбаротаи Қирғизистон ширкат мекунад


Ӯзбекистону Қирғизистон ҷузъиёти сохтмони муштараки нерӯгоҳи Қамбарота-1-ро баррасӣ мекунанд. Дар ин бора сафири Қирғизистон дар Ӯзбекистон Дониёр Сидиқов дар мусоҳиба бо расонаҳои Ӯзбекистон хабар додааст.

"Ӯзбекистон дар сохтмони нерӯгоҳи Қамбарота-1 ширкат мекунад. Ин созиш рӯи коғаз намондааст, балки амалӣ мешавад. Гуруҳи кории лоиҳаи мазкур нахустин мулоқотро дар шаҳри Тошканд анҷом дод ва қадамҳои минбаъдаро баррасӣ кард", - гуфт сафир.

Ба ақидаи вай, ин лоиҳаи бузурги минтақавӣ хоҳад буд, ки дар он бояд ҳамаи масъалаҳо ҳал, ҳамдигарфаҳмӣ таъмин ва манфиатҳои ҷонибҳо ба назар гирифта шавад.

"Ман фикр мекунам, ки Ӯзбекистон дар ин лоиҳа ҳам бо техникаҳояш ва ҳам бо зарфиятҳои молиаш ширкат карда метавонад", - мегӯяд сафир.

Ибтидои моҳи декабри соли ҷорӣ Ӯзбекистону Қирғизистон дар мавриди ҳамкории муштарак дар сохтмони нерӯгоҳи Қамбарота-1 ёддошт имзо карданд.

Қамбарота-1 бузургтарин тарҳи нерӯгоҳи обии Қирғизистон аст. Президенти пешини Ӯзбекистон Ислом Каримов мухолифи бунёди ин неругоҳ буд. Каримов бар ин назар буд, ки дар сурати сохтмони нерӯгоҳи мазкур мақомоти Қирғизистон метавонанд, оби дарёро банданд ва Ӯзбекистон аз обёрии заминҳои кишоварзиаш маҳрум шавад.

XS
SM
MD
LG