Ссылки доступа

Қозоғистондан Ўзбекистонга мол олиб кириш енгиллаштирилди (видео)


Ўзбек-қозоқ чегарасидаги назорат-ўтказиш пунктлари орқали умумий қиймати 1000 АҚШ долларигача бўлган ўз эҳтиёжи учун истеъмол товарлари 2018 йилнинг 1 январдан бошлаб Ўзбекистонга божсиз олиб кирилмоқда. Бу хабарни Ўзбекистон Давлат божхона қўмитасида тасдиқлашди.

Бундан аввал қўшни давлатлардан Ўзбекистонга божсиз олиб кириш мумкин бўлган товарларнинг умумий қиймати 10 долларгачагина эди.

Ўзбек-қозоқ чегара назорат-ўтказиш пунктларидан​ ​3 январь куни ўтиб-қайтган бир неча нафар ўзбекистонлик чегарадан мол олиб ўтиш эркинлашгани ва ўзбек божхоначилари "мулойим ва хушмуомала" бўлиб қолганини айтишди.

– Черняевка постида (Ўзбекистоннинг "Ғишткўприк", Қозоғистоннинг эса "Жибек жоли" чегара назорат-ўтказиш пунктлари - муҳарр.) божхоначилар шунақа мулойим, ишонгинг келмайди. 1000 долларгача бўлган молни бемалол ўтказишяпти, божхоначилар ҳам ортиқча текширмаяпти. Бунақа холатни биринчи марта кўришим”, - деди ўзбекистонлик савдогарлардан бири.

​Аввал хабар қилинганидек, чегаранинг Қозоғистон томонида жойлашган бозордаги нарх-навонинг Тошкент шаҳри ва вилояти бозорларидан 30-40 фоиз арзонлиги сабаб ўзбекистонликлар бозор-ўчарга Қозоғистонга боришади.

Ўзбекистон божхона қўмитаси ходими 1 январдан навбатлар йўқолгани ва 1000 долларгача бўлган мол божсиз олиб ўтилаётганини тасдиқлади. У шунингдек, Ўзбекистон фуқароларига умумий қиймати 1000 АҚШ долларигача бўлган ўз эҳтиёжи учун истеъмол товарлари 1 январдан бошлаб Қозоғистондан божсиз олиб кириш руҳсат этилганини тасдиқлади.

XS
SM
MD
LG