Ссылки доступа

ЎзМУ доценти депутатларга парламентда беқасам чопон кийиб ўтиришни таклиф қилди


Ўзбекистон Миллий университети доценти, Инновацион технологиялар маркази директор ўринбосари Мирёқуб Ҳайдаров Олий Мажлис депутатлари учун миллий анъаналарга асосланган дресс-код жорий этишни таклиф қилди.

Доцент Мирёқуб Ҳайдаровнинг фикрича, Олий Мажлис депутатлари парламент мажлисларига европача костюм-шим кийиб, бўйнига гастук тақиб келиш ўрнига миллий кийимларда, масалан, ёзда беқасам ёки банорас чопонларда келиши керак.

"Олий Мажлис депутатлари миллий кийимга ўтгач, навбат вилоят кенгашлари депутатларига келади ва уларнинг кийимларида минтақавий ўзгачаликлар акс этади: фарғоналик депутат фарғонача кийинади, хоразмлик депутат - хоразмча ва ҳоказо", - деб ёзди Мирёқуб Ҳайдаров 8 январь куни podrobno.uz сайтида эълон қилинган мақоласида.

Мақола муаллифининг фикрича, ўзбеклар миллийликка қайтиши лозим ва бу ишни депутатлар бошлаб бериши мумкин.

"Агар депутатларни мажлисларга махсус тасдиқланган бир хил миллий кийимда келишга мажбурловчи низом (қонуний меъёр) қабул қилинса эди, Олий Мажлиснинг кўриниши ўзгариб кетган бўлур эди. Масалан, ёз учун шоҳи чакмон, қиш учун духоба чопон жорий этилса, бу нафақат депутатлар зеҳниятининг, балки кийим стилининг аҳолининг барча қатламлари томонидан қабул қилиниши ўзгаришига таъсир қилган бўларди”, - деб ёзган Мирёқуб Ҳайдаров.

XS
SM
MD
LG