Ссылки доступа

Роғун ГЭСининг биринчи агрегати 2018 йилнинг ноябрида ишга туширилиши ваъда қилинди


Италиянинг Salini Impregilo компанияси раҳбари Пиетро Салини Тожикистон раҳбари Эмомали Раҳмонга Роғун ГЭСининг биринчи агрегати 2018 йилнинг 16 ноябрь куни эксплуатацияга топширилишини ваъда қилди. Бу ҳақда у тожик президенти билан учрашганидан сўнг 31 январь куни журналистларга айтди.

Пиетро Салинининг айтишича, у Роғун ГЭСи қурилиш майдонида бўлган ва қурилиш ишлари суръатидан қониқиш ҳосил қилган. «Мен Жаноби Олийларига Роғун ГЭСининг биринчи агрегати шу йилнинг 16 ноябрь куни эксплуатацияга топширилишига ваъда бердим», - деди Salini Impregilo компанияси раҳбари "Ховар" агентлигига.

Ўтган йили Salini Impregilo муҳандислик-қурилиш компанияси баёнот бериб, 2018 йилда Роғун ГЭСининг иккита агрегати эксплуатацияга туширилишини ва ишлаб чиқариладиган электроэнергия мамлакат ягона энергетика тармоғи орқали етказиб берилишини маълум қилган эди.

Тожикистон ҳукумати ўтган йилнинг ёзида Италиянинг компанияси билан Роғун ГЭСини қуриб битказиш юзасидан Шартнома имзолаган эди. Тожикистон хукуматининг баёнотига қараганда, шартонма қиймати $3,9 млрд.ни ташкил қилади. Сув омборининг биргина тўғони қурилиши учун $1 млрд. 950 млн талаб қилинади.

Мамлакат асосий энергетика лойиҳаси - Роғун ГЭСи қуриб битказилиши учун $4 млрд яқин маблағ керак. Тожикистон молия вазирлиги маълумотларига кўра, аҳолига “Роғун ГЭСи” ОАЖ акцияларини сотиш эвазига $80 млн.дан ортиқ маблағ тўпланди. Ўтган йили давлат бюджетидан гидроэлектростанция қурилиши учун 2 млрд сомони ($225 млн) маблағ ажратилди.

Роғун ГЭС Вахш дарёси қурилаётган тўққизинчи гидроэлектростанция ҳисобланади, иншоат Душанбе шаҳридан 110 км узоқликда жойлашган. 335 метрлик Роғун ГЭСи тош-тупроқли жаҳондаги энг йирик тўғон бўлади.

Тожикистон раҳбарнинг таъкидлашича, тўғон Вахш дарёси қуйида жойлашган ерларни ўзлаштириш ва суғоришни, жумладан қўшни давлатларни ҳам таъминлайди. Тожикистон ўз қўшниларини сувсиз қолдирмайди, дея баёнот берди Эмомали Раҳмон.

XS
SM
MD
LG