Бизнесмен Маргулан Сейсембаев 1 февраль куни кечқурун ўзининг Facebook'даги саҳифасида хорижда бир неча ой истиқомат қилганидан сўнг ватанига қайтаётгани ҳақида маълум қилди. У “энг юқори даражада” ўзининг хавфсизлиги таъминланишига ваъда берилгани ҳақида ёзди.
Январь ойида «Альянс Банк»нинг собиқ эгаси ва Қозоғистондаги таниқли тадбиркор баёнот бериб, ўзининг собиқ бизнес ҳамкори Искандер Еримбетов ( у БТА Банкдан олиб кетилган ноқонуний пулларни қонунийлаштиришда гумон қилинмоқда) иши бўйича бир неча бор тергов идораларига сўроққа чақирилгани боис хорижда қолишга қарор қилгани борасида маълум қилган эди.
2 февраль куни эрталаб тадбиркор Қозоғистонга келди. У журналистларга изоҳ бермаслигини ва қандай талаблар билан ватанга қайтгани ҳақида сўзлаб бермаслигини айтди. Сейсембаев фақт битта саволга- Facebook’да ёзгани каби “энг юқори даражада” ўзи ва оиласи учун хавфсизлик кафолатланишига ишонасизми?” деган саволга жавоб қайтарди. "Ишонмаганимда эди, келмас эдим", – деди Маргулан Сейсембаев.
51 ёшли Маргулан Сейсембаев иккинчи бор “кафиллик асосида” ватанига қайтмоқда. Саккиз йил муқаддам у қисқа муддатли муҳожирликдан сўнг қайтган ва Қозоғистон президенти Нурсултон Назарбоевга содиқлиги ҳақида баёнот берган эди. Бу ҳодиса ўзи раҳбарлик қиладиган «Альянс Банк»нинг давлат ихтиёрига ўтказилганидан сўнг юз берган эди.