Автомобиль транспорти, асосан енгил автомашиналар асосан Болтиқбўйи ва Европа мамлакатларидан импорт қилинади. Тожикистонга олиб кириладиган машиналарнинг катта қисми ўтган асрнинг 90-йиллари ва 2000 йилларнинг биринчи ярмида ишлаб чиқарилган. Импорт қилинадиган автомобилларнинг 80 фоизи Германия ҳиссасига тўғри келади, шундан катта қисми Opel русумидаги автомобиллардир.
2016 йил охирида Тожикистонда ярим миллиондан ортиқ автомобил рўйхатга олинган бўлиб, уларнинг 50-60% фоизи эскирган.Тожикистон Атроф-муҳитни муҳофаза қилиш Қўмитаси ходими Саидусмон Судуровнинг айтишича, бу автомашиналар теварак атрофга салбий таъсир кўрсатмоқда. Экспертларнинг фикрича, эски автомобиллар фуқаролар учун хам хавф туғдирмоқда.
Тожикистон ҳукумати 2017 йилдан бошлаб янги автомобиллар учун божхонга солиғини 50% га қисқартирди. Бу каби чоралар янги ва экологик тоза автомобилларни олиб кирилишини рағбатлантиришга қаратилган, демоқда Душанбе расмийлари.
Олиб кирилаётган янги автомобиллар учун божхона тўловларини қисқартириш борасида Тожикистон президенти 2016 йилнинг 22 декабрь куни парламентга қилган мурожаатида илк бор тилга олиб ўтган эди. Ўшанда Эмомали Раҳмон бу экология борасида қайғуриш билан боғлиқ эканини – янги машиналар эскиларига нисбатан зарарсиз эканини таъкидлаган эди.
Янги автомобиллар сифатида заводдан бир йилдан кўп бўлмаган даврда чиқарилган ва 10 минг километр масофани босиб ўтмаган машиналар кўрилади, дея баёнот берди Тожикистон Иқтисодий тараққиёт ва савдо вазири Неъматуло Ҳикматуллозода ўтган йилнинг март ойида парламент минбарида туриб. Унинг сўзларига қараганда, киритилаётган янгилик – йўловчи, енгил, юк ва махсус автомобилларнинг барча турига нисбатан қўлланилади.