Ўз исмини ошкор қилишни истамаган туркман амалдорининг сўзларига қараганда, янги курс “қора бозор курси”га яқинроқ бўлади.
у ҳафтада норасмий валюта айирбошлаш пунктларида Америка долларининг курси янги рекорд кўрсаткичга чиқди. 10 февраль куни 1 АҚШ доллари 14 манатдан 15 манат оралиғида тебраниб турди. Мамлакатда валюта нархининг бирданига кўтарилиб кетиши январь ойи ўрталарида бошланди, шундан кейин товар ва озиқ-овқат маҳсулотларнинг нархи кўтарилиб кетди.
Туркман манатининг расмий курси 2015 йилдан бери 3.5 манат 1 АҚШ доллари кўрсаткичида ўзгармай келади. Туркманистонда хорижий валюта норасмий тарзда сотилади ва харид қилинади. 2016 йил бошида Туркманистон Марказий банки нақд валюта айирбошлашни расман тақиқлади.
Сўнги икки йилда давлат курси бўйича аҳолининг қонуний равишда валюта айирбошлашининг бирдан бир йўли туркман манатидаги маблағларни мамлакат ичкарисида банк картларига ўтказиш, шундан кейин эса чет элда хорижий валютага алмаштириш бўлиб қолган эди.
“Озодлик” манбасининг таъкидлашича, нима бўлганда ҳам Марказий банк аҳолига валюта айирбошлаш учун етарлича маблағ топиб бера олмайди. Унинг сўзларига қараганда, айирбошлаш курсининг оширилиши инфляцияни ушлаб туриш учун керак. Хабарларга кўра, валюта курси Эрон ва Хитой билан бўлиб ўтадиган музокаралар натижаларига боғлиқ бўлиб турибди. Бу икки мамлакат Туркманистоннинг асосий савдо ҳамкори ва мамлакат учун валюта манбаи ҳисобланади.