Бу ҳақда Жўқўрғу Кенеш депутати Жанар Акаев маълум қилди. У ҳамкасблари билан биргаликда 13 февраль куни «Ата Мекен» партияси етакчиси билан учрашган эди.
- У умумий шароит ҳақида шикоят қилмади. Бироқ жазони ижро этиш муассасининг раҳбарияти иккита жиҳатга эътибор қаратмаяпти. Биринчиси – камерага ўрнатилган видеокузатувни олиб ташлаш ҳақидаги илтимос, чунки у 24соат кузатув остида. Иккинчиси – унинг оёғи ва юрагини даволаш мақсадида шифохонага ўтказилиши борасидаги илтимоси. Унинг айтишича, юрагини даволаш учун атиги бир ҳафта муддат сўраган.
Жанар Акаевнинг қўшимча қилишича, Омурбек Текебаевнинг бу илтимосларини парламент мажлисида маълум қилади.
Мухолифатдаги сиёсатчи Омурбек Текебаевнинг камерасига видеокамера ўрнатилгани 29 январь куни маълум бўлган эди. Жазони ижро этиш муассаси видеокамера хавфсизлик нуқтаи назаридан ўрнатилгани айтаётган бўлса, ҳуқуқ ҳимоячилари ва маҳбуснинг ўзи бу каби ҳаракатларни танқид қилмоқда.
«Ата Мекен» партияси етакчиси Омурбек Текебаев ва ҚРнинг Жанубий Кореядаги собиқ элчиси Дуйшенкул Чотонов 2017 йилнинг февралида 2010 йилда “Мегаком” компанияси акцияларини харид қилишда кўрсатган ёрдамлари учун РФ фуқароси Леонид Маевскийдан 1 миллион доллар олганликда гумон қилиниб ушланган эди. ҚР Олий суди 21 ноябрь куни туман ва шаҳар судлари томонидан ҳар икки сиёсатчига чиқарилган ҳукмни ўз кучида қолдирди. Суд қарорига кўра улар мол-мулки мусодара қилиниши билан 8 йил муддатга қатъий режимдаги колонияга ҳукм қилинган эди.