Шу муддат давомида 18 ёшли қизнинг йўқолиб қолгани юзасидан мустақил суриштирув олиб борган Туркман халқининг Украинадаги диаспораси раҳбари, адвокат Ровшанбек Розметовнинг айтишича, Муқаддас ўзи таълим олаётган олий ўқув юртидан Украинада бўлишини узайтиришучун керакли ҳужжатларни ололмаганидан сўнг ўз жонига қасд қилган.
Киевдаги А.А.Богомольц номли Миллий тиббиёт университети талабаси шу йилнинг 13 февраль куни йўқолиб қолгани маълум бўлди. Маълумотларга кўра, талабанинг Украинада бўлиш визаси ниҳоясига етган, бироқ ўзи ўқиётган факультетдан тегишли ҳужжат олганидан кейингина у вақтинча яшашга рухсат олиши мумкин эди. Украина матбуотида пайдо бўлган айрим хабарларга кўра, бу муаммони фақат деканнинг хорижий талабалар билан ишлаш бўйича ўринбосари Татьяна Тимохина ҳал қилиши мумкин экан. Бироқ, Ровшанбек Розметовнинг сўзларига таяниб, РБК-Украинанинг маълум қилишича, Тимохина «ўз вазифасини бажармаган, бунинг натижасида Муқаддаснинг сўнгги қарор қабул қилишига сабаб бўлган».
Университет раҳбариятининг таъкидлашича, Насирлаева ҳодисадан аввал ўқув юртида талабалар сафидан чиқарилган. 19 февраль куни олий ўқув юртининг расмий сайтида эълон қилинган хабарида таъкидланишича, талабанинг виза муддати ўтган йилнинг декабрида тугаган ва шунинг учун ҳам у ўқишдан ҳайдалган.
Насирлаеванинг жасади топилмади. “Альтернативные Новости Туркменистана” (Туркманистон Муқобил Янгиликлари)нинг маълум қилишича, ҳалок бўлган қизнинг оиласи вакили бўлмиш Ровшенбек Розметов Муқаддаснинг ўлими бўйича “ўз жонига қасд қилишга” олиб келишга қаратилган “қасддан ўлдириш” бўйича жиноий иш очилишига уринмоқда.