Кыздын өлүмүнө ал билим алган медициналык окуу жайдын жетекчилиги шектелүүдө. Бул окуяга байланыштуу апта башында чет элдик студенттер менен иштөө боюнча декандын орун басары жумуштан алынган.
Киев шаардык прокуратурасы Мукаддас Насыралиева 30-январда университеттен чыккандан кийин көпүрөдөн секирип кеткенин ырастады. Бул учур көзөмөл камерага тартылып калган.
Кыздын үй-бүлөсү аны университеттегилер өз жанын кыюуга чейин жеткиришкен деп эсептешүүдө.
Мукаддастын визасынын мөөнөтү аяктап, өлкөдө мыйзамсыз жүргөн. Ошол эле маалда ал сабактарга барып, сынактарды тапшыруусун уланта берген.
Адвокат Ровшанбек Розметовдун айтымында, деканат кыздын студенттик визасынын мөөнөтүн узартууга керек болгон документке кол коюп берген эмес.
Окуу жайдан учурда мекеме ичинде кызматтык териштирүү иштери жүрүп жатканын билдиришти.
