2017 йил охиридан бошлаб Тошкент вилоят прокурори бўлиб ишлаган Улуғбек Суннатов жорий йилнинг 5 январида Ўзбекистон президентининг топшириғи билан ишда йўл қўйган жиддий камчиликлари учун лавозимидан озод қилинган эди.
Ўзбекистон Бош прокуратурасида ишлайдиган ходимнинг билдиришича¸ Суннатов 22 февраль куни ҳибсга олинган собиқ Бош прокурор Рашид Қодиров иши доирасида ушланган.
"Улуғбек Суннатов ушлангани" ва ҳозир Бош прокуратура биносида "сўроқ қилинаётганлигини" айтган Ўзбекистон куч ишлатар тизимларидан бирида ишлайдиган зобитга кўра¸ Бош прокурорининг собиқ ўринбосарига нисбатан Жиноят кодексининг "Ҳокимият ёки мансаб ваколатини суиистеъмол қилиш" (205-модда) ва "Пора олиш" (210-модда) моддаларида назарда тутилган жиноятларни содир этишда гумон қилинмоқда.
Шунингдек, Улуғбек Суннатов Ўзбекистон Миллий Паралимпия Ассоциацияси раислигидан ҳам озод қилинган.
Ўзбекистон Миллий Олимпия қўмитасида ишлайдиган ва исми сир қолишини истаган мулозимнинг 26 февраль куни айтишича¸ собиқ Бош прокурор Рашиджон Қодиров Ўзбекистон МХХси собиқ раиси Рустам Иноятовга қарши берган кўрсатмадан кейин Улуғбек Суннатовни ушлаш ҳақида Бош прокуратура фармойиш берган.