Бундан аввал Тожикистондаги интернет-провайдерлар ва мобил алоқа компаниялари интернетни қаердан – Қирғизистон, Ўзбекистон ёки Хитойдан сотиб олишни ўзлари ҳал қилишарди. Январь ойида «Таджиктелеком» баёнот бериб, эндиликда интернет-трафикларни провайдер ва мобил компанияларига сотишини эълон қилди вабошқа мамлакатлардан ўз билганларича интернетни сотиб олишларини тақиқлади. Мобиль компаниялари ва интернет-провайдерлари бугунги кунда миллий оператордан интернетни бир гигабит канали учун $51 минг тўлаб сотиб олмоқда.
Икки ҳафта муқаддам Аксилмонополия хизмати раҳбари Саъди Қодирзода журналистнинг «Таджиктелеком» ҳаракати монополия эмасми, деб берган саволига жавоб берар экан, давлат интернет-провайдери 2010 йилда Табиий Монополиялар субъектлари реестрига киритилганини ва унинг фаолияти “Табиий монололиялар тўғрисидаги” қонун билан назорат қилинаётганини таъкидлади.
Бундан аввл Tcell, «Билайн», Babilon ва Мегафон компаниялари раҳбарияти ТР Бош прокуратурасига мурожаат қилиб бу қарорнинг қонунийлигини текшириб кўришни сўрашган эди. Уларнинг фикрича, бу қарор “Рақобатни ҳимоя қилиш тўғрисида”ги қонун ва “Ягона коммутация Маркази” тўғрисидаги фармойиш талабларига мос келмайди. Миллий оператор базасида ташкил этилган ЯКМ трафикларни назорат қилиш ва мувоффиқлаштириш учун керак, бу ўз навбатида давлат интернетни монополия қилиш ҳуқуқига эга деганини англатмайди, дейишмоқда бу компаниялар.
Тожикистон мобил алоқа операторлари ассоциацияси раиси Ғофур Иркаевнинг айтишича, «Таджиктелеком» ОАЖ ҳуқуқи тўғрисидаги қарор электрон алоқа хизматларини тақдим этувчи бошқа операторларни камситади. Унинг сўзларига кўра, ТР Аксилмонополия хизмати нима учун бир компания, майли у давлатга қарашли бўлсин, ўз талабларини бошқа мобил алоқа компанияларига қўйиши кераклигини тушунтириб бериши керак.
