Ғойиб бўлишидан олдин Мажидов цирк мол-мулкини талон-тарож қилганликда гумонланиб, терговга тортилган.
Ўзбекистон давлат циркига 30 йилдан ортиқ раҳбарлик қилган Ўзбекистон Xалқ артисти Баҳром Мажидовга нисбатан Ўзбекистон Ички ишлар вазирлиги қидирув эълон қилди.
Вазирлик сайтида шу ҳафта бошида пайдо бўлган эълонда Мажидовнинг Ўзбекистон Жиноят Кодексининг 164-моддаси - ўғирлик, талончиликда гумонланиб қидирилаётгани билдирилган. Цирк ходимларига кўра¸ Мажидов муқаддам цирк мол-мулкини талон-тарож қилганликда гумонланиб, терговга тортилган.
Ўзбекистон давлат циркида ишловчи ходимлардан бири собиқ раҳбари циркнинг 1 миллиард сўмдан ортиқ маблағини ўзлаштирганликда айбланиб судга тортилганини айтади. "Бунга бир йилча бўлиб қолди. Ҳозир унинг қаердалигини ҳеч ким билмайди. Кимлардир Москвада дейди. Ўша ерда циркда ишлаяпти, дейишади. Санъат одами кўчада қолмайди-да. У одам циркни анча қийин аҳволга солиб кетди. Ҳозир унинг ўрнига бошқа директор бўлган, циркни аста-секин оёққа турғизмоқда", деди цирк ходими.
Циркнинг исми сир қолишини истаган бошқа бир ходими Мажидов раҳбарлиги даврида циркдаги ҳайвонларнинг белгиланган меъёр бўйича мол гўшти билан эмас, балки эшак гўшти билан боқилганини айтади.
– Битта йўлбарс кунига 6-7 кило гўшт ейди. Лекин улар мол гўшти ўрнига уч баравар арзонга эшак гўшти олиб беришган. Ҳужжатларда эса мол гўшти, деб расмийлаштириб келишган. Циркда қанча ҳайвон бор, ўғирлик миқдорини тасаввур қилаяпсизми? Бундан ташқари Мажидов чет давлатларни циркига акробатларни муддатли ишлашга жўнатиб, шартномада берилиши керак пулларни ҳам талон-тарож қилган," дея иддао қилди цирк ходими.