Ссылки доступа

Шавкат Мирзиёев 15 март куни Қозоғистонга ташриф буюради


Ўзбекистон президенти Шавкат Мирзиёев Қозоғистон президенти Нурсултон Назарбоевнинг таклифига биноан 15 март куни Остонага ишчи ташриф билан боради.

Ташриф доирасида ўзбек делегацияси Марказий Осиё мамлакатлари раҳбарларининг кенг кун тартибига эга бўлган биринчи консультатив учрашувида қатнашади. Ушбу учрашув президент Шавкат Мирзиёвнинг таклифига биноан ўтказилади. У бу таклифни БМТ Бош Ассамблеясининг 72-сессиясида сўзлаган нутқида ўртага ташлаган эди ва уни ноябрь ойида Самарқандда бўлиб ўтган “Марказий Осиё: бир ўтмиш ва умумий келажак, барқарор ривожланиш ва ўзаро равнақ учун ҳамкорлик” халқаро конференциясида яхлит дастурга қадар ривожлантирган эди.

Ўзбекистоннинг ташаббуси минтақанинг барча мамлакатлари томонидан қўллаб-қувватланди. Қозоғистон биринчи одий даражадаги учрашувни Остонада ўтказишни таклиф қилди.

Ўзбекистон раҳбари ўша куннинг ўзида Қозоғистонда Ўзбекистон йилининг расмий очилиш тадбирида иштирок этади.

Шавкат Мирзиёевнинг Нурсултон Назарбоев билан икки томонлама учрашуви ҳам режалаштирилмоқда.

XS
SM
MD
LG