Тўрт мамлакат етакчиларининг қўшма баёнотида Россия содир бўлган ҳодиса учун жавобгар эканлиги, можаро эса Бирлашган Қиролликнинг суверенитетига ҳужум эканлиги таъкидланмоқда.
Баёнотда Россия Кимёвий қуролларни тақиқлаш тўғрисидаги конвенцияни бузганлиги яна таъкидланади. Британия, АҚШ, Германия ва Франция етакчилари Москвани Кимёвий қуролларни тақиқлаш ташкилотига Сергей Скрипалга ҳужум пайтида қўлланганлиги таъкидланаётган“Новичок” моддаси ҳақида ахборотларни беришга чақиради.
14 март куни Буюк Британия бош вазири Тереза Мэй Сергей Скрипалнинг заҳарланишида Россияни расман айблади ва 23 нафар россиялик дипломатнинг чиқариб юборилишини эълон қилди. Бу чорани АҚШ президентининг маъмуриятидагилар ҳам қўллаб-қувватлади. Бундай санкциялар ишлаб чиқилиши ҳақида Франция президенти ҳам эълон қилди. Россия ташқи ишлар вазири Сергей Лавров бунга жавобан Бртиания дипломатларини чиқариб юборишга ваъда берди. Қанча дипломат чиқариб юборилиши ва бу қачон рўй бериши ҳозирча маълум эмас.
4 март куни Сергей Скрипаль ва унинг қизи Юлия асабни фалажловчи моддадан заҳарланиб, ўта оғир аҳволда касалхонага ётқизилган эди. Терговда иштирок этган полициячи ҳам касалхонага тушди. Заҳарланишидан бир неча кун олдин БРБнинг собиқ агенти ўз ҳаёти учун хавфсираётганини Британия полициясига хабар қилган эди.