Ссылки доступа

Ўзбекистонда коллеж ўқувчилари президент учун ишга тушмаган завод ишчилари ролини ўйнаб берди


30 март куни Жиззах вилоятига борган президент Шавкат Мирзиëев сафарини Зарбдор туманидан бошлади. Президент бу ерда ўз топшириғига мувофиқ қурилган “Зарбдор текстил” МЧЖ фаолияти билан танишди.

Бироқ зарбдорликлар президентнинг бу корхонага ташрифи тўғрисидаги хабарга илова қилинган суратларда акс этган манзарани “президент учун уюштирилган шоу” деб аташди.​

“Бугун президент Зарбдорга келди. Лекин муҳтарам президентимизни яна алдашди. У кишининг олдида қилинган барча ишлар кўзбўямачилик. Сабаби¸ коллеж ўқувчиларини президентга ишлайди¸ деб кўрсатишди!!! Бунга ишонган президентимиз не умидларда хурсанд бўлиб кетди”¸ деди зарбдорликлардан бири.

Бу суҳбатдош¸ 30 март куни “Зарбдор текстил”да уюштирилган “спектакл”га бевосита гувоҳ бўлганини айтиб берди. “Зарбдордаги Қишлоқ хўжалик ва Иқтисодиëт коллежи қизларини махсус тайëрлашди. Уларга¸ мабодо президент олдига келиб¸ гаплашмоқчи бўлса¸ нима дейишгача ëдлатишди. Бу қизлар янги ишга кирган тикувчи¸ иш билан таъминланган ëшлар ролини ўйнаб берди”¸ деди суҳбатдош.

Зарбдор туманида яшайдиган ўқитувчилардан бири Касб-ҳунар коллежининг 3-босқичида ўқийдиган набираси "Зарбдор текстил"нинг ишчиси бўлиб бир неча соат ишлаб келганини айтди. Тумандаги коллежлар мутасаддилари ҳам президент Шавкат Мирзиëев ташрифи учун махсус томоша уюштирилганини тасдиқлади.

Жиззах вилоят ҳокимлигининг мулозими “Зарбдор текстил”нинг ишга туширилгани ва унда йил охиригача 1060 иш ўрни яратилишини билдирди.

“30-март куни 1-линия ишга туширилди. Маҳаллий аҳоли учун янги иш ўринлари яратилди. Апрель охиригача 864 та иш ўрни яратилади. Йилнинг 4-чорагига бориб¸ яна 196 иш ўрни яратилади ва жами 1060 одам иш билан таъминланган бўлади. Буларни эшитиб¸ президентимиз хурсанд бўлдилар”¸ деди ҳокимият расмийси.

XS
SM
MD
LG