Ўзбекистон президенти Шавкат Мирзиёевнинг Сирдарё вилоятига сафари 4 апрелда кутилган эди. Аммо, вилоят ҳокимлигидан билдирилишича, президент сафари номаълум муддатга қолдирилган.
Президентнинг вилоятга бориши олдидан, бутун республикада бўлгани каби, Сирдарёда ҳам ободончилик ишлари авж олган, президент ўтиши эҳтимоли бўлган катта йўл бўйидаги уйлар девори ва томининг кўча томонини бир хил рангга бўятиш ишлари олиб борилган.
Исроил Ризаевнинг айтишича, унинг уйи ҳам катта йўлнинг бўйида жойлашгани сабаб сариқ рангга бўяш буюрилган, аммо у бунга қарши чиққан.
- Бутун уйимнинг атрофини тўқ сариқ рангга бўятамиз дейишди. Мен уларга айтдим, бу менинг уйим, бу менинг шахсий мулким, мен сариқ рангга бўятишни истамайман, десам, сен бунга мажбурсан деяпти. Қизиғи шундаки, бу ишларнинг тепасида туман ички ишлар бўлими бошлиғи Элёр Абдуллаев турибди. Президент келиб-кетганидан сўнг хоҳлаган рангингга бўяйверасан, ҳозир кўча томон ҳаммаси бир хил рангда бўлиш керак, деяпти, - дейди ҳуқуқ фаоли.
Ризаевнинг айтишича, у қаршилигини давом эттиравергач, милиция бошлиғи туман Мажбурий ижро бюросидан вакил чақиртириб, уни жазолашни буюрган. "МИБдан Абдусамат Қаҳрамонов деган ходим етиб келди. Менга светга қарзинг бор деб, уч миллион сўм жарима ёзиб ташлади. Мен, бироз қарзим борлигини, лекин мен ва ўғлим тўлаган пулларнинг ҳаммасини квитанцияси борлиги, бу баҳсталаб масала эканини айтсам ҳам, таппа ўша ернинг ўзида жарима қиляпти. Лекин, бу менинг қаршилигим учун ўша жойнинг ўзида берилган жазо эканлигини англаб бўлган эдим", - дейди Исроил Ризаев.
Ҳуқуқ фаолининг айтишича, унинг уйининг дарвозаси ҳам қўпориб ташланган. Сабаби - "дарвоза умумий кўринишни бузиб турибди экан". "Кейин боре, нима қилсаларинг қилинглар, дедим. Ўзлари ранг пуркагич билан бўяб кетишди. Кўзбўямачиликдан бошқа нарса эмас бу. Президентнинг келишига уйимнинг ярмини сариққа, томимни кўкка бўятишимнинг менга нима кераги бор?”, - дейди Исроил Ризаев.
Мирзаобод туман ички ишлар бўлими бошлиғи Элёр Абдуллаев шу можарода иштирок этганини тан олди, лекин унинг топшириғи билан Исроил Ризаев жарима қилинганини инкор қилди.