Ссылки доступа

Түркмөн өкмөтү экономика өнүгүп жатканын билдирди


Түркмөнстан өкмөтүнүн жыйыны (архив сүрөт)

Түркмөн өкмөтү 4-майдагы жыйын маалында жыл башынан бери ички дүң өнүм жалпысынан 6,2 пайызга өскөнүн билдирди.

Расмий маалыматтарга караганда, былтыркы жылдын ушул эле мезгилине салыштырмалуу азык-түлүк өнүмү дагы 4,2 пайызга көбөйгөн.

Өкмөт ошондой эле төрт айдын жыйынтыгында товар жүгүртүү көлөмү 18,2 пайызга өсүп, ошол эле маалда күнүмдүк керектөөчү товарларга болгон баалар менен калк үчүн кызмат тарифтери белгиленген чектен ашпаганын билдирди.

Экономика өсүп жаткандыгы тууралуу түркмөн өкмөтүнүн кезектеги отчету өлкөдө нан менен ундун тартыш болуп, азык-түлүк алууда чектөөлөр киргизилип, кезек күткөндөр көп болуп жаткандыгы тууралуу билдирүүлөргө туура келүүдө. Андан тышкары өлкөдө электр энергиясы, суу жана газ үчүн каралган жеңилдиктердин жоюлушу менен коммуналдык кызматтардын баасы дагы өскөнү айтылып келет.

Түркмөн өкмөтү ошондой эле бюджетте иштегендердин айлыктары, пенсиялар жана студенттердин стипендиялары өз учурунда төлөнүп жатканын билдирди. Ал ортодо жыл башынан бери көз карандысыз булактар саламаттык сактоо, билим берүү жана мунайгаз тармагындагы айрым мекемелерде кызматкерлердин айлыгы убагында берилбей жатканын бир канча жолу кабарлашкан.

Түркмөн бийлиги өлкөдө азык-түлүк тартыштыгы болуп, мамлекеттик тармактарды каржылоодогу каатчылыкты расмий түрдө моюнуна албай келет.

XS
SM
MD
LG