Исроил мегӯяд, системаи дифоии "гунбади оҳанин" теъдоде аз ин мушакҳоро раҳгирӣ кард ва ин ҳамлаҳо ҳеҷ талафот ё захмие дар пай надоштанд. Подполковники артиши Исроил Ҷонатан Конрикус гуфт, мушакҳоро нирӯҳои “Қудс”, як воҳиди хориҷии Сипоҳи посдорони Эрон партофтанд.
“Артиши Исроил ин ҳамлаи Эронро бисёр ҷиддӣ қабул хоҳад кард”- афзуд Конрикус дар сӯҳбат бо рӯзноманигорон. Ӯ афзуд, ки аз ҷузъиёти зарбаҳои ҷавобии Исроил огаҳӣ надорад.
Хабаргузории расмии Сурия субҳи 10 май иттилоъ дод, ки ба наздикиҳои шаҳри Димишқ ва ноҳияҳои дигари ин кишвар даҳҳо мушак партоб шуд. Ба иттилои манбаъ, дар натиҷа як дастгоҳи радар ва анбори муҳимоти ҷангӣ маҳв шуданд.
Сурия 9 май Исроилро айбдор кард, ки мавзеи низомиёни эрониро дар ҷануби Димишқ мушакборон намуд. Ба гуфтаи шоҳидон, дар натиҷаи зарбаҳои 9 май 15 одам, аз ҷумла 8 ҷангҷӯи эронӣ кушта шуданд. Эрон гуфт, ба ин зарбаҳо, ки ба иддаои он, аз тарафи артиши Исроил анҷом шудаанд, посух хоҳад дод.