Судья Алима Адилованинг айтишича, Алтай Аншибаев учта эпизод бўйича айбланмоқда. Жиноий ишда Оқтўбе вилояти ИИД полициясининг Илек туман бўлими биносини таъмирлаш учун 2016 йил июнида ажратилган 18 миллион тенге (55 минг доллар) тилга олинади. Бир ой ўтиб эса автоустахонани таъмирлаш учун алоҳида 23 миллион тенгедан кўп маблағ йўналтирилган. 2017 йил июлида эса Заречная полиция бўлими биносини таъмирлашга 7 миллион тенге ажратилади. Терговчиларнинг фикрича, таъмирлаш ишларни амалга оширган пудратчи ширкати режани тўлалигича бажармаган, бироқ шунга қарамай компанияга асоссиз равишда маблағлар ўтказиб берилган.
Давлат харидлари учун маъсул бўлган ИИД бошлиғининг ўринбосари йўл қўйилган қонун бузилишларини тан олмади ва тергов вақтида ўзини уй қамоғида сақлашларини илтимос қилди. Бироқ судья озодликда бўлган Аншибаев терговга босим ўтказиши мумкин деган хулосага келди ва вақтинчалик тергов изоляторида ушлаб турилиши борасида санкция берди. Судда таъкидланишича, бундан аввал гумондор терговчиларнинг чақирувини инкор қилган ва Уральскка жўнаб кетган.
Вилоят ИИД маълумотига кўра, департамент бошлиғининг ўринбосари томонидан йўл қўйилган эҳтимолий ҳуқуқ бузилишларини ички хавфсизлик бошқармаси фош қилган. Шундан сўнг иш коррупцияга қарши кураш хизматига топширилган. Полициянинг маълум қилишича, ҳозирча Аншибаев бу иш бўйича ягона гумондор сифатида кўрилмоқда.