– “Яндекс.Такси” иловасини телефонига юклаб олиб, лицензияси бўлмаса ҳам таксичилик қилаётганлар кўпайиб кетди. Ҳозир биз шуларга қарши рейдлар ўтказиб, ноқонуний таксичилик қилаётганларни ушлаяпмиз. Тўрт кунда элликтасини ушладик, - деди Ўзбекистон автомобиль транспорти агентлиги мулозими.
Эслатиб ўтамиз, "Яндекс.Такси" хизмати Ўзбекистон йўловчи ташиш бозорида ўтган ой фаолиятини бошлаган эди. “Яндекс.Такси”нинг Москвадаги маркази вакили Надежда Леонидова ўзи ишлаётган ширкатнинг Тошкентда ушланган ноқонуний киракашларга алоқаси йўқлигини айтди. "Биз ҳайдовчилар билан тўғридан-тўғри ишламаяпмиз. Маҳаллий ҳамкорлар бор, расман рўйхатдан ўтган, лицензияси бор ҳамкорлар билан ишлаймиз", - дейди “Яндекс.Такси”нинг Москвадаги маркази вакили.
Йўловчилар смартфон ёрдамида “Яндекс.Такси”га буюртма беришади. Таксига буюртма бериш учун фақат мобил иловани очиш ва бориш керак бўлган жойни кўрсатиш кифоя. Тошкентлик ҳайдовчининг айтишича, арзонлиги ва қулайлиги сабаб “Яндекс.Такси” йўловчиларнинг қизиқишини қозонган.
Лекин, тошкентлик киракашнинг айтишича, ҳам лицензия олиб, ҳам “Яндекс.Такси” белгилаган талаб асосида ишлаш ўзини оқламаётгани сабаб кўпчилик ноқонуний ишлаяпти. "Лицензия учун ойига 450-600 минг сўм ($50дан зиёд) тўлаш керак. “Яндекс.Такси” ҳам 20 фоиз комиссия олади. Шунинг учун кўпчилик “Яндекс.Такси” иловасини юклаб лицензия олмасдан ишлаяпти. 20 фоиз комиссияни тўлаб, одам ташияпти", - дейди ҳайдовчи.
“Яндекс.Такси” Ўзбекиситонда фаолиятини бошлаганидан бир ой ўтиб мамлакатдаги бошқа такси ширкатлари норозилигига учради. Маҳаллий ОАВларга кўра, Тошкентда йўловчи ташиш билан шуғулланувчи ўнлаб хизматлар Ўзбекистон автомобиль транспорти агентлиги ва Давлат рақобат қўмитасига Ўзбекистон ҳудудида "Яндекс.Такси"нинг ноқонуний фаолиятини тўхтатишни сўраб мурожаат қилган.