2 июнь куни мазкур бозорда юз берган ёнғин оқибатида бир нечта омбор ва 20дан ортиқ савдо нуқтаси ёниб кетди. Кўрилган зарар, дастлабки ҳисоб -китобларга қараганда, 100 минг сомони (11 минг доллардан кўп)ни ташкил қилади.
Султон Кабировнинг 3 июнь куни айтишича, асосан олти қаватли бинонинг биринчи қавати зарар кўрди. «Бугун Душанбе шаҳар маъмуриятидан келишди. Бизга савдо нуқталарини тиклаш учун бир ҳафта муҳлат беришди. Ҳуқуқ тартибот идоралари ходимлари, ўт ўчирувчиларга раҳмат, алангани кенг тарқалишига йўл қўйишмади, акс ҳолда кўрилган зарар янада каттароқ бўларди», - дейди Кабиров.
Пойтахт маъмурияти 3 июнь куни баёнот бериб, ёнғин сабабларини аниқлаш мақсадида оператив-тергов гуруҳи ташкил этилганини билдирди. «Султони Кабир» бозорида фаолият юритувчи тадбиркорлардан бирининг айтишича, ҳокимият вакиллари якшанба куни эрталаб улар билан суҳбатлашган. «Бизга берилган ёрдам яхши бўлган. Чунки бошқа бозорларда юз берган ёнғинлар оқибатида тадбиркорлар ўзларининг муаммолари билан ёлғиз қолишган», - дейди тадбиркор.
«Султони Кабир» - Душанбедаги йирик бозорлардан бири бўлиб, 2 июнь куни соат 20.00лардан кейин ёниб кетди. Аланга тўрт соат ўтиб бартараф этилди. «Аланга 1230 квадрат метр майдони қамраб олди. Бахтимизга инсоний талофатлар қайд қилинмади», - дейишди Душанбе ҳокимиятидагилар.
Ҳозирча ёнғин сабаблари аниқ эмас, бироқ версиялардан бири – куннинг иссиқ пайтида хавфсизлик қоидаларига риоя этмаслик экани айтилмоқда.
