Уйчи тумани мажбурий ижро бюроси собиқ бошлиғи Шерали Мамаризаев аҳолидан қарздорликни ундириш режасини бажаролмаган ходимларини онасидан сўкиб, “к...т, хезалак, блядь, тварь, ҳароми” каби сўзлар билан ҳақорат қилгани ҳақида ўтган ҳафтата хабар қилинган эди.
Бу аудиони Озодликка тақдим қилган Мажбурий ижро бюроси ходимларининг иддао қилишича, ҳақорат қилаётган амалдор уларнинг бошлиғи - Наманган вилоят, Уйчи туман Мажбурий ижро бюроси бошлиғи Шерали Мамаризаевдир. Бу аудиофайлларни юборган ходимнинг айтишича, улар яширин равишда декабрь ва апрель ойлари орасида йиғилишларда ёзиб олинган. Ходимлар ўзларининг кимлигини ошкор қилишдан бош тортдилар.
Уларнинг айтишича, бу аудиолардагидан февраль ойдаги ҳақоратлари хусусида улар президент порталига шикоят қилган.
Исми сир қолишини сўраган МИБ ходимларидан бирининг 30 июнь куни айтишича, мақола эълон қилинганидан сўнг бир неча нафар уйчилик оқсоқоллар Шерали Мамаризаевнинг олдига бориб, нега уйчиликларни ҳақорат қилганини изоҳлаб беришни талаб қилган.
– Бир-икки нафар отахон ҳассаси билан солган ҳам. Кейин бошлиқ қочиб кетган. Шундан кейин бошқа кўринмай қолди. Ишни ўринбосари бошқариб турди. Ўтган ҳафта вилоят МИБидан келишиб, янги раҳбарни қўйиб кетишди. Сўконғич раҳбар шу кетганича йўқолди”, дейди МИБ ходимларидан бири.
Унинг айтишича, собиқ бошлиқ ишдан кетганидан сўнг жамоада янгича ишлаш кайфияти пайдо бўлган.