Мақолада таъкидланишича, Россия ва Хитойдаги валюта бозоридаги беқарорликдан ўз хавфсизлигини таъминлаш мақсадида Қирғизистон ўз олтин заҳирасини 16 фоиздан 50 фоизгача оширишга қарор қилди, мамлакатнинг олтин валюта заҳиралари 2 млрд долларга етган.
ҚР Миллий банки раиси Толқунбек Абдигулов нашрга интервью берар экан, «ўйин қоидалари ўзгарганини» маълум қилди. «Бизнинг заҳирамизда қандай валюта - доллар, юань ёки рубл бўлишидан қатъий назар, биз заифмиз, шу сабабли биз олтин заҳираларимизни кўпайтиришимиз керак», - деди Абдигулов.
Олтин бўйича Жаҳон Кенгаши маълумотларига кўра, бундай сиёсат Қирғизистон олтин заҳираларини фоиз ҳисобида Россия қимматбахо металлари, шунингдек иқтисодий жиҳатдан тараққий этган Туркия ва Ҳиндистон билан таққослаш имконини беради.
Толқунбек Абдигуловнинг сўзларига қараганда, Қирғизистон ҳозиргига қараганда, янада кўпроқ олтин қазиб олиши мумкин. Нашрнинг маълум қилишича 2017 йилда Канаданинг Centerra Gold компанияси томонидан фойдаланиладиган кондан 3,4 млрд долларга тенг олтин қазиб олинган. ҚР Миллий Банки раҳбарининг айтишича, ўзининг етти йиллик бошқаруви даврида, яъни 2024 йилга қадар мамлакат олтин заҳирасини кўпайтиршни ният қилган.
«Агар биз олтинни сотмоқчи бўлсак, бу ишни ҳар қандай вақтда амалга оширишимиз мумкин ва уни ўзимизга қулай бўлган валютага конвертация қилиш мумкин. Биз мамлакатимизда жуда ҳам кўп олтин қазиб олишимизни инобатга олган ҳолда Худонинг ўзи олтин заҳираларимизни катта миқдорда ушлаб туришимизга имкон яратди», - дея хулоса қилди Толқунбек Абдигулов Bloomberg билан суҳбатда.