Ссылки доступа

Ашхобод аҳолиси 47 даража иссиқда бир неча кундан бери сувсиз қолаяпти


Ашхобод марказида жойлашган бир нечта микротуманлар аҳолиси охирги уч кун мобайнида сувсиз қолмоқда. Маҳаллий аҳолининг сўзларига қараганда, Тинчлик-1 ва Тинчлик-2 микротуманларининг уйларига сув бериш 29 июнь, жума куни кечқурун тўхтатилган.

2 июль куни кундузи, шундай уйлардан бирида яшовчи, шарҳловчи Омонмурод Бугаев билан суҳбат пайтида ҳам сув йўқ эди. Унинг сўзларига қараганда, гарчи туман маъмуриятига шикоят берилган бўлса-да, аҳвол шундайлигича қолмоқда. Ашхободда ҳаво ҳарорати сояда 47 даражани ташкил қилаяпти.

Азатлиқнинг Ашхободдаги мухбирлари сўзларига кўра, ушбу микротуманларни сув билан таъминлаш учун масъул бўлган муассасалардагилар сув беришнинг тўхтатилишини ускунанинг носозлиги билан изоҳлашди ва тегишли тиклаш ишлари амалга оширилаётганини хабар қилишди.

Шу билан бирга, Тинчлик-2/1 микротуманлари аҳолиси хабар қилишига қараганда, 1 июль куни туш пайтида баъзи уйларда чекланган миқдорда сув берилиши таъминланган, бироқ ярим соатдан сўнг, яна тўхтаган. Бундан ташқари, 2 июль куни шу микротуманга аҳолига бериш учун бир цистерна сув келтирилган бўлиб, у бир соат ичида тугаб қолган.

Омонмурод Бугаев: Ўн тонналик сув ташиш машинаси келтиришди. Унга 300-350 кишилик навбат пайдо бўлди, ҳатто1-1.5 литрлик пластик идишлар ушлаб олган болалар ҳам навбатга туришди. Бу уч кун давомидаги ягона машина эди.

​Замонавий Ашхободнинг инфраструктурасида аҳоли учун бепул сув беришга мўлжалланган жойлар назарда тутилмаган. Авваламбор паркларда ва кўчалар бўйлаб жойлашган фавворалар ва водопровод кранлари шаҳарни ободонлаштириш ишлари доирасида олиб ташланган эди.

Шундай шароитларда, ҳозирги вақтда Ашхобод аҳолиси мустақил равишда қўлга киритиш мумкин бўлган сув манбаларини излашга мажубр бўлмоқда.

XS
SM
MD
LG