Рентген-тадқиқот игналар бош чаноғи, буруннинг қуйи қисми, оёқ, бўйин ва кўкрак қафаси, шунингдек бола танасининг бошқа қисмларидан топилган. Айрим игналар терининг ичкарисигача кириб кетгани боис шифокорлар атиги 6та игнани олиб ташлашга муваффақ бўлишди, яна 4 та игна ҳамон гўдакнинг танасида қолмоқда.
Миллий тиббиёт марказининг болалар жарроҳлик бўлими шифокорларининг айтишича, 28 июнь куни уларга 9 ойлик болакай Мудассир Каримовнинг қариндошлари мурожаат қилган ва шундан сўнг гўдак зудлик билан шифохонага ётқизилган, унинг баданида игналар борлиги аниқланди. Шифокорларнинг айтишларича, игналар болакайнинг баданида салкам уч ойдан бери бўлган.
Болалар жарроҳлиги бўлими мудири Шуҳрат Чориев 3 июль куни «Бугун биз биринчи жарроҳлик амалиётини ўтказдик ва балакайнинг баданидан 6 та игнани олдик. Жарроҳлик амалиёти узоқ давом этишини инобатга олган ҳолда биз қорин ва бош чаноғидаги игналарни олмасликка қарор қилдик. Ўзингиз тушунасиз, бу каби амалиётларни ўтказиш болакай учун оғир бўлади», деди.
Шифокорларнинг айтишича, агар болакайнинг ўзи игналарни ютиб юборганида эди, у ҳолда ички органларига зиён етказган бўларди ва игналар ошқозон-ичак йўлида туриб қолган бўларди.
Мудассир Каримов - Рудакий туманидаги Конституция қишлоғида истиқомат қилувчи оиланинг иккинчи фарзанди. Болакайнинг отаси меҳнат миграциясига кетган, онаси – уй бекаси ва фарзандларини ўзи тарбия қилмоқда. Болакайнинг қариндошлари игналар қандай қилиб гўдакнинг ички органларига тушиб қолганини билмасликларини айтишмоқда.
Кичкина мижознинг бувиси Маҳфират Ҳасанованинг айтишича, айрим игналарни бир ой аввал билиб қолишган, онаси болакайни эмизаётганида милкидаги игналарни кўриб қолган. «Рамазон ойи эди. Келиним гўдак ухлаб қолмасидан аввал эмизмоқчи бўлган. Бирданига бақириб юборди, ҳамда пинцет олиб келишимизни сўради. Биз пинцетни излаётганимизда, келин игнани милкдан тортиб олди. Игна тўмтоқ эмасди, бироқ игнанинг тешиги жойида эди», - дейди Ҳасанова.
Гўдакни жарроҳлик амалиётида қатнашган шифокорлар бу каби вазият билан илк бор тўқнаш келишганини айтишмоқда. Шуҳрат Чориевнинг айтишича, иккита игна тикув машинасиники бўлган, яна иккита тушунарсиз ўткир металл парчасини топишган. «Яна иккитаси оддий игна эди. Улар янги эмас, гўдак баданида анча туриб қолгани учун занглай бошлаган эди», - дейди шифокор.
Мудассирнинг қариндошларининг айтишларича, жарроҳлик амалиётига қадар гўдак одатий ҳаёт кечирган, касаллик ёки бошқа безовталиклар борасида шубҳага борилмаган.