«Хартыя97» нашрининг маълум қилишича, Белорусс қурувчиларининг хориждаги энг катта лойиҳаси бўлмиш - Туркманистондаги Гарлиқ калий комбинатининг қурилиши барбод бўлди. Бунинг натижасида мамлакат бюджети таҳминан 200 миллион долларга минусга кирди.
Нашр маълумотига кўра, журналистлар Гарлиқ лойиҳасидаги белорусс давлат харидларини таҳлил қилдилар ва қурилиш материалларини харид қилишда эҳтимолий “арралаш” кўринишларини фош қилишди. Масалан, «Белгорхимпром» купершлак металл кукунини бир тоннасини - 190 доллардан сотиб олган, Россияда бу материал икки баробар арзон эди. Натижада харид 30 минг доллар ўрнига 90 минг долларга тушди. Пудратни ким ва қандай харид қилгани ҳақида маълум қилинмади, дейилади белорусс медиа нашрлари хабарида.
Гарлиқ Тоғ-Кон комбинати қурилиши учун буюртмачи Давлатга тегишли «Туркменхимия» концернидир, Бош пудратчи эса йирик белорусс компаниялари иштирокида «Белгорхимпром»дир.
Гарлиқ Тоғ-Кон комбинати (ТКК) Туркманистон шарқида жойлашган бўлиб, тантанали равишда 2017 йилнинг31 март куни икки мамлакат президентлари Гурбангули Бердимуҳамедов ва Александр Лукашенко иштирокида топширилган эди. Туркманистон хукуматининг хабар қилишича, Гарлиқ Тоғ Кон комбинатининг қурилиши тўлалигича Туркманистон давлат маблағлари ҳисобидан молиялаштирилган ва бунинг учун хазинадан 1 миллиард доллар ажратилган.
Қиймати 1 миллиард АҚШ долларига тенг Тоғ-Кон комбинати қурилиши борасидаги Битим 2009 йилда имзоланган эди. Аввалига қурилиш 2015 йилда якунланиши керак эди, бироқ икки йилга чўзилиб кетди. Комбинатнинг фойдаланишга топширилиши муддатининг кечикиб кетиши томонлар ўртасидаги қарама қаршиликларга сабаб бўлди.