Умумий қиймати 34 миллиард долларга тенг саноат товарлари -қишлоқ хўжалиги плугларидан тортиб ярим ўтказгич ва самолёт қурилишида ишлатиладиган тўпловчи жиҳозларгача бўлган маҳсулотлар 25-фоизлик божларга тортилади. Бу рақам Хитой томонидан жавоб чоралари кўриладиган тақдирда икки ҳафтадан сўнг 50 миллиард долларгача етиши мумкин.
Бу чоралар, президент Трампнинг сўзларига қараганда, Пекиннинг Хитой бозорини Америка маҳсулотлари учун очишдан воз кечгани ва Американинг юқори технологияли компанияларини ҳимоя қилиш мақсадида кўрилмоқда. Маълумки, Америка компаниялари Хитой бозорига кирадиган бўлса, у ҳолда технологияларни Хитой компанияларига беришга тўғри келар эди.
Хитой зудлик билан жавоб чоралари кўришга тайёрлигини билдирди. Хитойнинг асосий импорт тарифлари сифатида Америка қишлоқ хўжалик маҳсулотлари кўрилмоқда.
34 миллиард доллар - бу Хитойнинг АҚШга йиллик экспортининг бир фоизидан камроғи демакдир. Бироқ, экспертларнинг огоҳлантиришларича, Хитой томонидан кўриладиган жавоб чоралари Америка томонидан янги божлар жорий қилинишини тақозо қилади, бу ўз навбатида жаҳон иқтисодиётидаги энг йирик дея тан олинган икки мамлакат ўртасида кенг қамровли савдо урушини келтириб чиқариши мумкин, шубҳасиз бу уруш жаҳон иқтисодиётига салбий таъсир кўрсатади. ХХР фонд биржаларида бир неча ойдан бери истиқболда савдо уруши келиб чиқиши эҳтимоли туфайли акциялар курси тушиб кетмоқда.
Президент Трамп кўрилаётган чоралар маҳсулотларни Хитойга экспорт қиладиган, экспортни кенгайтирадиган ва бу мамлакатда ишлаб чиқариш қувватини амалга ошираётган Америка компанияларига салбий таъсир қилишидан қатъий назар, Хитойнинг АҚШга қиладиган барча экспорт маҳсулотларига бож жорий қилишга тайёрлигини билдирди.