Қозоғистон Ташқи ишлар вазирлиги матбуот котиби Айбек Смадияровнинг хабар беришича, ушланган шахсга инсон соғлигига қасддан шикаст етказиш бўйича айблов эълон қилинган. Смадияровнинг журналистларга айтишига кўра, қозоғистонлик камида 30 августга қадар қамоқхонада ўтиради. Матбуот котиби у Москвадаги вақтинчалик сақлаш изоляторида эканлигини маълум қилди. Қозоғистонлик консул аспирантнинг ҳолидан хабар олиш учун бу жойга борган.
“Адвокат билан алоқа йўлга қўйилди. Унда таъминот ва саломатлик бўйича ҳеч қандай шикоят йўқ”, - дея қўшимча қилди у.
Эслатиб ўтамиз, 29 июнь куни олий ўқув юрти ўқитувчиси асосий корпус ҳудудида унга нисбатан қилинган ҳужумдан сўнг пичоқдан олган жароҳати билан шифохонага ётқизилган эди.
Ҳужум қилган шахс, ОАВ маълумотига кўра, воқеа жойидан яширинган. Россия давлат янгиликлар агентлигининг хавфсизлик органларидаги манбаларига таяниб хабар беришича, ҳужум қилган 1992 йилда туғилган, илгари ушбу олий ўқув юртидан четлаштирилган эркак киши эканлиги аниқланган.
Жорий ой бошида эса Москва шаҳар Басман суди гумондор – Жаслан Кудейбергеновга нисбатан 30 августга қадар қамоққа олиш эҳтиёт чорасини қўллаш бўйича тергов илтимосномасини қондиргани маълум бўлди.