Ссылки доступа

Африкада россиялик журналист Орхан Жамол ва унинг ҳамкасблари ҳалок бўлди


Марказий Африка Республикасида журналист Орхан Жамол, оператор Кирилл Радченко ва режиссёр Александр Расторгуев ҳалок бўлди, дея хабар беради "Дождь" телеканали Михаил Ходорковскийнинг «Суриширувлар бошқармаси маркази» лойиҳасидаги манбага таяниб.

Журналистлар "Вагнер" хусусий ҳарбий компания фаолияти ҳақида фильмни суратга олаётган эди.

Орхан Жамолнинг ўлимини BBC билан суҳбатда «Суриширувлар бошқармаси маркази» бош муҳаррири Андрей Коняхин ва журналистнинг дўсти Максим Шевченко тасдиқлади. Коняхиннинг РБКга айтишича, журналистлар 28 июль, шанба куни эрталаб Марказий Африка Республикасига келишган. "Сўнгги бор биз улар билан 26 июль кечқурун алоқада бўлган эдик. Биз нима юз бергани билан боғлиқ тафсилотларни аниқ билмаймиз", – деди Коняхин.

Бошқа бир манбанинг таъкидлашича, россияликлар блокпостда тўхтатилган. Улар республика пойтахти Банги шаҳридан бошқа шаҳарга кетаётган эди. Улар билан нима бўлгани аниқ эмас. Ҳалок бўлганларнинг шахси аниқланди.

Россия ТИВ Африкада киногуруҳ аъзолари ҳалок бўлганини расман тасдиқлади. Уч нафар россиялик - Кирилл Радченко, Александр Расторгуев ва Орхан Жамолда журналистик фаолияти учун гувоҳнома бўлган. Уларнинг жасади Бангига олиб келинди.

Афсуски, МАРдаги Россия элчихонаси мамлакат ҳудудида россиялик журналистларнинг бўлишидан огоҳлантирилмаган, дейилади Россия ТИВ хабарида. Дипломатик миссия ходимлари россиялик фуқароларнинг ҳалок бўлишининг сабабларини ўрганиш ва жасадларни ватанга қайтариш бўйича маҳаллий ҳуқуқ тартибот идоралари ва ҳукумат тузилмалари билан мустаҳкам ҳамкорлик қилиб турибди.

Орхан Жамол – таниқли россиялик журналист, ҳарбий низолар ва мусулмон мамлакатлари бўйича мутахассис. У Шимолий Кавказ, Афғонистон, Ироқ, Ливан ва Сурияда ишлаган ҳамда 2008 йил августида юз берган Россия-Грузин можаросига бағишлаган «Беш кунлик уруш хроникаси» деб номланган китоб ёзган.

Бунда аввал МАРда уч нафар россияликнинг ҳалок бўлгани ҳақида хабар тарқатилди, уларнинг икки нафарида «Известия» газетасининг пресс-карталари бор эди. AFP маълумотларига кўра, уларнинг жасади Сибут шаҳридан 23 километр узоқликда топилди. Агентликнинг таъкидлашича, россияликлар аниқланмаган қуролли кишилар томонидан ўлдирилган. Кейинроқ «Известия» нашрнинг бирорта ҳам ходими МАРда бўлмаганини маълум қилди.

Марказий Африка Республикасидаги низолар 2013 йилда президент Франсуа Бозизе ағдариб ташланганидан сўнг қайта бошланиб кетди. Унинг ўрнини эгаллаган Фаустин-Армене Туадера фақат мамлакат пойтахти Банги ва унинг атрофини назорат қилади. МАРда БМТнинг 13 минг кишилик тинчликни сақловчи кучлари жойлаштирилган. Мамлакатнинг катта қисмини 15та гуруҳ бўлиб олган ҳолда бошқаради.

XS
SM
MD
LG