Ссылки доступа

Ўзбекистон МХХнинг собиқ бошлиғи Рустам Иноятов сенаторлар рўйхатида йўқ


МХХнинг собиқ раҳбари, ишдан олинганидан сўнг президент маслаҳатчиси ва Олий Мажлис Сенати аъзолигига тайинланган Рустам Иноятовнинг исми-шарифи сенаторлар рўйхатида мавжуд эмас.

Бу фарқни биринчи бўлиб аниқлаган Uzmetronom.com нашри “Унинг фамилияси ўчириб ташланганми ёки аввал бошданоқ рўйхатда бўлмаганми - айтиш қийин, чунки буни қўқисдан билиб қолдик. Лекин жорий йилнинг 31 январь куни маҳаллий нашрлар Рустам Иноятов Олий Мажлис Сенатининг аъзоси ҳамда Президентининг сиёсий-ҳуқуқий масалалар бўйича Давлат маслаҳатчиси этиб тайинлангани ҳақида хабар қилган эди. Тўғрироғи, Ўзбекистон президентининг сайтида Иноятов Рустам Расулевичнинг сенатор этиб тайниланганлиги ҳақида маълумот эълон қилинмаган”, деб ёзди.

Озодлик Сенат сайтини диққат билан ўрганиб чиқди ва ҳақиқатан ҳам Рустам Иноятовнинг исми-шарифи сенаторлар рўйхатида йўқ эканига гувоҳ бўлди.

Қолаверса, Самарқанд вилоятининг собиқ ҳокими, июль ойи бошида қамоққа олинган Туроб Жўраевнинг ҳамон бу рўйхатда қолаётганини аниқлади. Сенат матбуот хизмати ходими Комила Зиёева бу борадаги саволига жавоб берар экан, “бу англашилмоқчилик бўлса керак”, деб айтди. Кейинроқ Туроб Жўраевнинг фамилияси сенаторлар рўйхатидан олиб ташланди.

Озодлик мухбирининг “Рустам Иноятов сенатор сифатида амалда фаолият кўрсатаяптими?” деган саволига матбуот хизмати ходими: "Албатта, у киши сенаторлар. У сенатор сифатида фаолият кўрсатаяпти",- деб билдирди. Аммо Сенат сайтидан жой олган Сенат раҳбарияти, Кенгаши, қўмиталар ва комиссиялар аъзолари рўйхатида Рустам Иноятов номи қайд этилмаган.

Таъкидлаш жоизки, бу Ўзбекистонда 20 йилдан кўпроқ вақт қудратли шахслардан бири бўлган Рустам Иноятов номи "унитилиб қолгани" билан боғлиқ биринчи ҳолат эмас. Президент Шавкат Мирзиёев томонидан 1 август куни имзоланган “Ўзбекистон Республикасида инвестиция муҳитини тубдан яхшилаш чора-тадбирлари тўғрисида”ги фармон ижросини назорат қилиш вазифаси Давлат маслаҳатчиси Рустам Иноятовга эмас, балки унинг ўринбосари Б.М. Мавлонов зиммасига юклатилган.

МХХни қарийб 23 йил давомида бошқариб келган ва 2018 йилнинг 31 январь куни истеъфога чиқарилган Рустам Иноятов президент Мирзиёев фармони билан ўша куннинг ўзидаёқ Олий Мажлис Сенатининг аъзоси этиб тайинланган эди. 31 январда президентнинг яна бир фармони билан Иноятов Ўзбекистон Президентининг сиёсий-ҳуқуқий масалалар бўйича Давлат маслаҳатчиси этиб тайинланганди.

Озодлик Радиоси ўзбек хизматининг материали.

XS
SM
MD
LG