23 ёшли такси ҳайдовчиси Муҳаммад Иззатуллаев салонда чет элликлар унутиб қолдирган ҳамён ва ҳужжатларни кўриб қолганида йўқотилган нарсаларни қайтариш ҳамда тожиклар меҳмондўст ва яхши халқ эканлигини исбот қилиш учун дарҳол ўз йўловчиларини қидира бошлаганини айтиб берди.
Таксичининг сўзларига қараганда, 8 август куни Тожикистон бўйлаб саёҳат қилиб юрган америкалик Мэтью Пушел ўз рафиқаси ва кичик ёшдаги боласи билан бирга унинг йўловчиси бўлган. Муҳаммад уларни керакли жойгача олиб бориб қўйган, лекин у ердан жўнаб кетганидан сўнг, орқа ўриндиқда ҳамён ҳамда ҳужжатлар унутиб қолдирилганини сезиб қолган. «Мен нима қилишни билмай қолдим. Онам чет элликларни туширган жойимга қайтиб боришимни маслаҳат берди. Мен шундай қилдим, лекин у ерда ҳеч кимни топа олмади. Кейин “Хавфсиз шаҳар” марказига мурожаат қилдим, - деб ҳикоя қилади йигит.
Айни пайтда Мэтью шу ердан ўтиб кетаётган милиционерларга мурожаат қилиб, ҳужжатларни топишда ёрдам беришларини сўраган эди. Муҳаммад йўқотилган нарсаларни бераётганида, қувониб кетган Мэтью уни қучоқлаб олди ва иккаласининг ҳам кўзларидан ёш чиқиб кетди.
ИИВ бу ҳақда ўзининг сайтида ёзиб чиқди. Ҳуқуқни ҳимоя қилиш идораси Мэтью Пушелнинг сўзларини иқтибос қилиб келтиради: «Ўз ҳамёним ва ҳужжатларимни таксида унутиб қолдирганим учун мен айбдорман. Мен уларни топишимга ишонмагандим. Лекин туристик полиция ёрдамида уларни 20 дақиқа ичида топдик. Айтсам ишонмайсиз, улар менга ҳужжатларим ва ҳамёнимни қайтаришганида, қувонганимдан кўзларимдан ёш чиқиб кетди. Бу ҳолат мен учун сюрприз бўлди, чунки эртаси куни биз оилам билан уйга, Америкага қайтишимиз керак эди».
Милициянинг туристик бўлинмаси Данғарада туристлар гуруҳига шафқатсиз ҳужум қилинганидан уч кун ўтгандан кейин тузилган эди. Уларнинг вазифаларига жамоат тартибини сақлаш, хавфсизликни таъминлаш, чет эллик туристларга ҳамроҳлик қилиш, улар учун зарур ахборотларни тақдим этиш киради.