Илк АЭС Тўдакўл сув омбори атрофига қурилади. Сунъий сув омбори Бухородан 25 километр шимолий-шарқда жойлашган. Қурилиш майдони сув мавжудлиги, сейсмо-пассив ҳудуд ва инфратузилмалар тизимига яқинлиги мезонлари инобатга олинган ҳолда танланди. Атом станциясининг майдони тоғлардан йироқ бўлиб, сейсмик фаол Памир-Ҳиндиқуш ҳудудидан 700 километр узоқликда жойлашган, шунингдек Бухоро ва Навоийдаги йирик саноат инфратузилмаларига яқин.
Россиянинг «Росатом»и иккита энергоблокдан иборат мажмуа қурмоқчи. АЭСнинг қуввати 2300 МВт ни ташкил қилади, бу мамлакатнинг электрэнергияга бўлган эҳтиёжининг 20% ни қоплайди. Ҳукумат расмийларининг ҳисоб-китобларига қараганда, атом электростанцияси 4 млрд кубометргача бўлган табиий газни тежаш ва бир йилда $600 млн ишлаб олиш имконини яратади.
АЭС қурилишининг танқидчилари Ўзбекистон қуёш энергиясидан фойдаланиладиган электростанция қуриши мумкинлигини айтишади. Республика субтропик минтақада жойлашган, бу ерда қуёш панеллари учун улкан ҳудуд мавжуд, бироқ уларга сарфланадиган маблағ АЭС қурилиши ва хизмат кўрсатишга сарфланадиган маблағдан ошиб кетар экан.
Атом станцияси қурилишининг расман бошланиши Россия президентининг Ўзбекистонга ташрифи доирасида бўлиб ўтади.