Бу ҳақида Flightradar24 интернет-ресурси маълумотига асосланиб “Хроника Туркменистана” нашри хабар берди.
Давлат раҳбарининг Германияга расмий ташрифи кутилмаётган эди. Шу билан бир қаторда бортда туркман етакчиси бор-йўқлиги ҳам аниқ эмас. Бироқ мазкур рейс ҳақида матбуотда ҳеч қандай хабар берилмагани учун, нашр уни президент самолётининг Германияга қилган навбатдаги “маҳфий” парвози деб атамоқда.
“Хроника Туркменистана” яна шуни қайд этадики, сўнгги ойларда президент самолётлари Германияга ошкор этилмаган парвозларни амалга оширмоқда. Учишдан кўзланган мақсад ҳақида маҳаллий матбуот лом-мим демаяпти.
10 июнь куни ҳам Туркманистон президенти самолётларидан бири Франкфурт аэропортига маҳаллий вақт билан соат 11:50да қўнган. У ерда бир ярим соат турган самолёт орқага Ашхободга қайтиб келган. 14 июнь куни соат эрталабки 7:00да ҳам Туркманистон президентининг Боинг 737 лайнери яна Франкфурт аэропортига қўниб, орадан икки ярим соат ўтиб ортга қайтиб кетган. 26 июнь куни президентнинг Боинг 737 самолёти бир ой давомида учинчи бор Германияга парвоз қилиб, Мюнхенга қўнган.
Шунингдек, шу йилнинг 17 февраль куни Англиянинг Лутон шаҳрига президент лайнерларидан бири рейс амалга оширгани ҳақида хабар берилган. Ўшанда ҳам инглиз шаҳрига келган Боинг 737 орадан икки соат ўтиб ортга қайтиб кетган. Бу санадан бир неча кун олдин, яъни 7 февраль куни шу самолётнинг ўзи Лондонга учган. Буюк Британияга амалга оширилган ҳар икки парвозда ҳам бортда давлат раҳбари бўлмаган.