Ссылки доступа

Хитойдаги «лагер тутқинлари»нинг қариндошлари Остонадан ёрдам сўрамоқда


17 октябрь куни Олмаотада бир гуруҳ этник қозоқлар – Шинжоннинг Или-Қозоқ мухтор округидаги Тоққузтор уездидан кўчиб келганлар – Остонага мурожаат қилиб, Хитойдаги «сиёсий қайта тарбиялаш лагерлари»да ушлаб турилган қариндошларини у ердан олиб чиқишга ёрдам беришга чақиришди.

Учрашув иштирокчилари баёнот бериб, озод бўлишга муваффақ бўлган қариндошлари «сиёсий қайта тарбиялаш лагерлари» яқинида маҳаллий расмийлар томонидан ижтимоий объектлар жиҳозланаётгани борасида хабар берганларини айтишди. Йиғилиш иштирокчилари Қозоғистон президенти Нурсултон Назарбоев, президентнинг «Нур Отан» партияси ва Қозоғистон ТИВдан ёрдам беришларини сўрашди.

Сўнгги бир неча ҳафта давомида Хитойнинг Шинжон Уйғур мухтор ўлкаси (ШУМЎ)нинг бошқа округларидан келган ўнлаб этник қозоқлар Ғарб мамлакатларининг консулхоналари ва халқаро ташкилотларга ёрдам сўраб мурожаат қилишди. Ўтган ой сўнгида ШУМЎнинг Или Қозоқ мухтор округи Монголкуре уездидан келган ўнлаб фуқаролар Олмаотадаги «Уют» меҳмонхонасида матбуот анжумани ўтказиб, Хитойда қариндошларига нисбатан репрессия уюштирилаётганини айтишди. Меҳмонхонага прокуратуранинг икки вакили келиб «тинч йиғилиш ўтказиш ва ташкилаштириш тартиблари» ҳақида тушунтириш берганлари ва бу каби йиғилишлар оқибатлари ҳақида огоҳлантирганларидан сўнг матбуот анжумани якунланди.

Шинжонда этник камчиликларни оммавий тарзда «сиёсий қайта тарбиялаш лагерларига» ташланаётгани ҳақида ҳуқуқни ҳимоя қилувчи ташкилотлар ва жаҳон ОАВ бонг урмоқда. Хитойда этник қозоқлар таъқиб қилиниши ва улар қамоққа ташланаётгани ҳақида 2017 йил апрелидан бошлаб хабар кела бошлади.

16 октябрь куни давлатга тегишли Xinhua агентлиги сайтида Шинжон ҳукумати раҳбари Шохрат Закирнинг эълон қилинган мақоласида «лагерлар» «гуманизм» руҳида экани таъкидланади. Унинг таъкидлашича, очиқ тарзда фаолият юритадиган лагерлар терроризм ва экстремизмга қарши туришга хизмат қилади.

XS
SM
MD
LG