Ссылки доступа

Туркия прокуратураси: журналист Жамол Хашогги консулхона кириши биланоқ бўғиб ўлдирилган


Қотиллар Жамол Хашогги(Қошиқчи)ни Саудия Арабистони консулхонаси ҳудудига кириши биланоқ бўғиб ўлдиришган, сўнгра унинг танасини бўлаклашган. Бу ҳақида Туркия прокурори Ирфан Фидан саудиялик ҳамкасби билан учрашганидан сўнг маълум қилди. Унинг айтишича, мазкур учрашув “аниқ натижа” бермаган.

“Жиноят қурбони бўлган Жамол Хашогги 2 октябрь куни консулхонага кириши билан бўғиб ўлдирилган”, — дейилади прокурор баёнотида. У қотиллик сценарийси олдиндан тайёрланганлигини таъкидлаб ўтди. “Қурбоннинг жасади бўғишдан сўнг бўлакланган ва йўқ қилиб юборилган.

Бу ҳам олдиндан режалаштирилган”, - деди прокурор.
Мазкур хабар Саудия Арабистони бош прокурори шайх Сауд ал-Муҳиб Истанбулни тарк этганидан бир неча соат ўтиб пайдо бўлган. У Туркияда бир неча кун бўлиб, шу вақт ичида туркиялик касбдоши билан икки марта учрашди ва қотиллик рўй берган консулликка ташриф буюрди.

Туркия расмийлари Саудия Арабистони билан ҳамкорликдан норозиликларини ҳам билдириб ўтган. “Ҳақиқатнинг тагига етишга бўлган уринишларимизга қарамай, ушбу учрашувлар ҳеч қандай конкрет натижалар бермади”, - дейилади Туркия прокурори баёнотида.

Журналист Жамол Хашогги 2 октябрь куни Саудия Арабистонининг Истанбулдаги консуллигига киргандан сўнг йўқолиб қолганди. У уйланиши олдидан мазкур муассасага ўзи учун зарар бўлган маълумотномани олиш учун ташриф буюрганди. Унинг жасади ҳалигача топилгани йўқ. Туркия президенти Режэп Эрдоган Саудия Арабистонини қотиллик буюртмачиси ким эканлигини ҳамда жасад қаердалигини айтишга бир неча бор чақирди.

XS
SM
MD
LG