Мажлис Украина ва Россия томонининг ташаббуси билан чақирилмоқда. Москва Азов денгизидаги вазият хавфли ривожланиши ва шундан сўнг юзага келган ҳодиса туфайли мажлис чақирилишини талаб қилмоқда. Киев эса Россия томонидан бўлган тажовуз туфайли мурожаат қилгани ҳақида баёнот берди. «Тажовузкорнинг шармандали ўзини тутишини фақат мувоффиқлаштирилган ҳаракатлар билангина тўхтатиш мумкин», — дея Twitter’да ёзди Украинанинг БМТдаги доимий вакили Владимир Ельченко.
Азов денгизидаги вазият 25 ноябрь куни бирданига кескинлашиб кетди. Украина ҳарбийларининг хабар беришича, Украина Ҳарбий денгиз кучларининг учта кемаси Керч бўғозида куч ишлатилган ҳолда қўлга олинган. Олти нафар украиналик денгизчи жароҳат олди. Россия ФХХнинг таъкидлашича, Украина кемалари Россия чегарасини бузган ва Қора денгизда қўлга олинган, уларни тўхтатиш мақсадида қурол ишлатилган.
Украина Олий Радаси 26 ноябрь, душанба куни мамлакатда ҳарбий ҳолат жорий этиш масаласини кўриб чиқиши керак. Бу борадаги қарор аввалроқ Украина Милий хавфсизлик ва мудофаа кенгаши томонидан қабул қилинди.
Душанбега ўтар кечаси Киевда Россия дипломатик рақами бўлган автомобиль ёниб кетди. Машина дипломатик ваколатхона яқинидаги бурчакка қўйиб кетилган эди. Аввалроқ Россиянинг Киевдаги элчихонасига кўздан ёш оқизувчи мосламалар отилган эди.