22 қараша күні өткен сотта прокурор Ілияс Есқалиев Әблязовтің Тәтішевті өлтіруді ұйымдастырғаны "толық дәлелденгенін" айтып, оған өмірлік түрме жазасын кесуді сұраған еді. Әблязовтің мемлекет тағайындаған адвокаты Жанар Қисықова оның кінәлі екеніне дәлел жеткіліксіз екенін мәлімдеген.
Ержан Тәтішев 2004 жылы аңшылықта жүргенде оқ тиіп өлген. Сол кезде мұны сот "жазатайым оқиға" деп танып, банкирдің жанында бірге болған кәсіпкер Мұратхан Тоқмадиді бір жылға соттаған. Бірақ 2017 жылы іс қайта қаралып, Мұратхан Тоқмади "Тәтішевті "ТұранӘлем" банкін иеленуді көздеген Мұхтар Әблязовтің тапсырысымен өлтірдім" деген. Сот оны 2018 жылы он жарым жылға соттаған.
Қазақстан бас прокуратурасы биыл 4 сәуірде Мұхтар Әблязовтің үстінен "банкир Ержан Тәтішевті өлтіруді ұйымдастырды" деген айыппен қылмыстық іс қозғаған.
Тергеушілер мәліметінше, Мұхтар Әблязов "бизнесмен Мұратхан Тоқмәди арқылы "ТұранӘлем" банкі иелерінің бірі Ержан Тәтішевтің көзін құртып, банк активін иеленбек болған". 2009 жылдан бері шетелде тұратын Әблязов бұған дейін әлеуметтік желілерде Тәтішевтің өліміне қатысын әлденеше рет жоққа шығарған.
Мұхтар Әблязов өзіне қатысты барлық айыптаулардың саяси себебі бар деп санайды. Қазақстан соты Әблязовті "қылмыстық топ құрды" және "ақша жымқырды" деп, 2017 жылы сырттай 20 жылға соттаған.