Воқеа тафсилотларидан хабардор андижонликнинг Озодликка хабар беришича, ушбу ҳодиса 23 ноябрь, кеч соат 23:00да Хўжаобод туман ҳокимлиги биносида ўтаётган "базм" давомида содир бўлган. “Уч нафар эркак иккита вояга етмаган 7-синф ўқувчи қизларини олиб чиқиб, базм уюштиришган. Дискотека қилишган. Базм пайти қизлардан бири ўзини бинонинг 3-қаватидан пастга ташлаган. Қиз деразадан ўзини ташлаган пайтда яланғоч аҳволда бўлган. Қиз оғир тан жароҳати олиб, тезда касалхонага ётқизилган”, дейди суҳбатдош.
Хўжаобод туман касалхонасидан олинган маълумотга кўра, жароҳат олган қиз уч кундан буён шифохонанинг жонлантириш бўлимида даволанмоқда. “Аҳволи бир хилда оғир. Иккала қўли синган. Бурни синган. Бош мия чайқалиши бор. Жонлантириш бўлимида яна 2-3 кун ётади. Кейин режали бўлимга ўтказамиз. Ҳали анча даволаниши керак”, деди шифокор.
Хўжаобод туман ҳокимлигининг Озодлик боғланган мулозими воқеа тафсилотларини қисман очиқлади.
– Ўша куни 13 яшар иккита қиз ҳақиқатан ҳам ҳокимлик жойлашган бинонинг хоналаридан бирига ярим тунда кириб келишган. Бу хона мулк кадастрига қарашли бўлган. Ўша куни шу бўлим мулозимларидан бирининг ўғли ҳам ўша ерда бўлган. Яна бир нечта ёш йигитлар бўлган. Кейин шу иккита қиз келган ва ҳаммаси музикани овозини баланд қўйиб, рақсга тушишган. Кейин ҳокимликдаги милиция ходимларидан бири шовқинни эшитиб, ўша хонага кирган. Қизлардан бири милицияни кўриб, қўрқиб кетган ва ўзини деразадан ташлаган”, деди ҳокимлик мулозими.
Бироқ мулозим қиз деразадан ташлаган пайти яланғоч бўлган-бўлмаганидан бехабарлигини айтди. Мулозимга кўра, ушбу воқеа бўйича туман Ички ишлар бўлими суриштирув ишларини олиб бормоқда.
13 яшар қиз ўқийдиган мактаб раҳбарлари қизнинг 7-синфда ўқиши ва у аҳлоқи оғир ўқувчилардан бири эканлигини айтишди. "Қизнинг аҳлоқи борасида милиция бўлимига олдиндан хабар берганмиз. Қиз тўғрисида олдиндан дело очилган. Қизнинг отаси йўқ, онаси қизининг тарбиясига енгил қараяпти. Биз онасини бир неча бор огоҳлантирганмиз", деди мактаб раҳбарларидан бири.