Ҳайдовчи инспекторлар унинг иштирокисиз машинани тинтув қилгани ва холисларга бўм-бўш қоғозга имзо қўйдириб олишганини айтади ва бу ҳолат видеода акс этган.
Инспекторлар билан тортишаётган йигит Андижон шаҳрида яшовчи тадбиркор, 29 яшар Давронбек Шокиров эканлиги маълум бўлди.
Тадбиркор сўзларига кўра, жорий йилнинг 25 март куни у ўз машинасида, лекин йўловчи ўриндиғида ўтирган пайтда, ЙҲХ инспекторлари уни маст ҳолда машина бошқарганликда гумонлаб, ушлашган.
Тадбиркорнинг айтишича, вилоят йўл ҳаракати хавфсизлиги бу ишни судга оширгандан кейин, вилоятдаги олтита маъмурий суд бу ишни кўриб чиққан, лекин биттаси ҳам бирор қарорга келолмаган.
- Менинг машинам тўхтаб турган эди, мен озгина ичганим учун автомобилни бошқаришни ўртоғимга берган эдим. Мен йўловчи ўриндиғида ўтирган эдим. Шу пайт инспекторлар келиб мендан ҳужжат сўраб, “ичиб олдингизми”, деди. Мен уларга, “ичганманми-йўқми, мен рулда эмасманку, нима қиласиз мендан ҳужжат сўраб”, дедим. Кейин биттаси машинага шарт ўтирдида, рейд қилаётган жойларига ҳайдаб кетди. У ердан эса наркологияга олиб боришди, - деди Давронбек Шокиров.
Тадбиркорнинг иддао қилишича, наркология бўлимида унга юзаки ташхис қўйилган.
Андижон вилоят прокуроратурасида Давронбек Шокиров аризасига ёзган жавобида айтилишича, “ариза асосида терговга қадар текширув ўтказилиб, натижасига кўра, бирон-бир шахснинг ҳаракатида жиноят таркиби аниқланмаганлиги сабабли жиноят иши қўзғатишни рад этиш ҳақида қарор қабул қилинган”.
Давронбек Шокировнинг айтишича, у сўнгги мактубни Ўзбекистон Судьялар Олий кенгашидан 18 сентябрда олган. Бу жавобда унинг мурожаатини кўриб чиқиш Андижон вилоят Маъмурий судига юборилгани ёзилган. "Ўшандан буён ҳеч қандай суд ҳам бўлгани йўқ, суддан таклифнома ҳам олганим йўқ", деди тадбиркор.