Қўшма Штатлар Россия «тўлаши керак бўлган» «нархни оширади», деди вакил.
АҚШ Давлат департаменти Европа Иттифоқига мурожаат қилиб, Керчь бўғозида юз берган ҳодиса ва шундан кейин украин денгизчиларининг ҳибсга олингани туфайли "Шимолий оқим -2" дан воз кечишга чақирди. Европа газ инфраструктуралари Украинани четлаб ўтар экан, Россиянинг ҳарбий тажовузини олдини олиш ва тўхтатиш шунча заифлашаверади, дея ҳисоблайди Америка ташқи сиёсат маҳкамаси.
Куни кеча Украина Қуролли кучлари бош штаби бошлиғи Виктор Муженко Россия томонидан бўладиган ҳарбий таҳдидни 2014 йилдан кейинги энг йириги бўлган дея баҳолаган эди."Қаршимизда ҳуқуқий, маънавий ва бошқа доираларга сиғмайдиган тажовузкор турибди. Унинг Украинага қарши қачон ҳарбий ҳаракатлар бошлашини айтиш қийин", - дея баёнот берди Муженко Reuters агентлигига берган интервьюсида. Шу муносабат билан у Украина чегаралари яқинида Россия танк гуруҳларининг бирданига кўпайтирилганини таъкидлаб ўтди. Унинг маълумотларига кўра, сўнгги 2 ҳафтада танк гуруҳлари 2 баробардан кўпроқ - 93 тадан 250 тагача оширилган.
25 ноябрь куни Россия чегарачилари аннексия қилинган Қрим соҳилларида Украина ҳарбий денгиз кучларига тегишли учта кемани ўққа тутди, сўнг қўлга олди. Москванинг таъкидлашича, кемалар Россия давлат чегарасини бузиб ўтган. Украина эса Россия ҳаракатларини "очиқчасига ҳарбий тажовуз" дея атади. Кейинроқ Россия суди 24 нафар украиналик денгизчиларни давлат чегарасидан ноқонуний ўтгани боис 2 ой муддатда ҳибсда ушлаб турилиши борасида қарор қабул қилди. Улар олти йилгача озодликдан маҳрум қилинишлари мумкин.
Ғарб мамлакатларининг етакчилари Россиядан денгизчилар зудлик билан озод қилинишини талаб қилишмоқда.