Тўрткўл туманидаги коллежлардан бирида ўқитувчи бўлиб ишлаган 59 яшар Аминбой Ниёзимбетовнинг ўзининг машинасида ишдан қайтаётиб автоҳалокатга учраган. Автоҳалокат ортидан туман марказий касалхонасига ҳушсиз келтирилган ва 14 кун комада ётиб, 22 ноябрь куни вафот этган.
Марҳумнинг жияни Аҳмад ва укаси Рашид касалхонада чироқ мунтазам равишда кунига 2-3 марта ўчиб турганини айтиб берди. Уларнинг айтишича, касалхонада электр узилганида фойдаланиш учун движок йўқ, беморни эса, сунъий нафас олдириш тизимига улаб қўйишган.
- Ўзимиз қўлимиз билан качать қилиб кислород бердик. Бошқа иложи йўқ. Свет йўқ. Амакимга ўхшаганлар кўп. Ҳеч кими йўқ одамлар, кислород берадиган одами йўқлар ўлиб кетаверади. Биз умид қилиб, отамизни 14 кун шундай сақладик, - деди Аҳмад. Бундай гапни марҳумнинг укаси Рашид ҳам айтди.
Аҳмаднинг айтишича, комада ётган амакиси 7 кун деганда қўлларини қимирлата бошлаган, 10- куни бироз кўзини ҳам очган.
- 14- куни бош врачнинг қабулига кирдик. Балки Тошкентдан врач чақиртириш керакдир, агар шундай бўлса, харажатини кўтарамиз, дедик. Бош врач бизни амаким ётган палатага бошлади. Борсак, амакимга қараётган дўхтир “ўлганига ярим соат бўлди”, деди, - деди Аҳмад.
Аҳмад ва унинг амакиси Рашиднинг иддао қилишича, уларнинг “нега ўлганига ярим соат бўлган эса, сиз бизга 15 минут олдин, яъни ўлимдан кейин дори буюрдингиз?” деган саволига врач бундай жавоб берган: “Беморнинг ўлганини ички ишлар ходимлари келганидан кейин айтишим керак, шунинг учун ўлганнинг ўлганини дарров айта олмайман, органдан одам келиши керак эди, шунинг учун айтмаётган эдим”.
Тўрткўл туман Соғлиқни сақлаш бўлими мудирининг Даволаш ишлари бўйича муовини Рашид Ражаббоев беморга унинг ўлимидан кейин дори буюрилганига оид саволга “менинг бу воқеадан хабарим йўқ”, деб жавоб берди.
Доктор Ражаббоев касалхона электр таъминотида узилишлар бўлаётганини тан олди. “Айрим вақтда бўлиб туради узилишлар, лекин движогимиз бор”, деди у. Движокнинг қувватига оид саволга жавобан, Ражаббоев унинг “операционний бўлим учун” эканлигини айтди.
Ўзбекистонда электр энергияси таъминотидаги узилишлар йиллардан буён сурункали давом этмоқда. Ҳукумат бу муаммони ҳал қилиш учун АЭС ва қатор ГЭСлар қуриш режаларини эълон қилган.