Ссылки доступа

Туркманистонда алкогол тўғрисидаги қонундан кейин унинг қимматлашиши кутилмоқда


Туркманистонда алкогол тўғрисида қонун қабул қилинганидан сўнг алкогол маҳсулотларнинг қимматлашуви ва сотуви чекланиши кутилмоқда. Бу ҳақда мустақил "Хроника Туркменистана" нашри ҳам маълум қилди.

Таъкидланишича, қонун матнида алкогол билан савдо-сотиқ фақат дўконларнинг ароқ-вино бўлимларида ва ихтисослаштирилган савдо нуқталарида, шунингдек ресторан, бар ва қаҳвахоналарда, унда ҳам бўлса фақат касса аппарати ва тўлов терминали бўлган ҳолдагина сотилиши таъкидланади; дўконларда алкогол сотуви фақат иш кунлари соат 10 дан 20га қадар амалга оширилади; 21 ёшга етмаган одамларга алкогол сотиш тақиқланади.

Маҳаллий медиа нашрларнинг маълум қилишича, қонун босқичма босқич ҳаётга татбиқ этилади, биринчи чекловлар 2019 йилнинг 1 январидан кучга киради, кейинги қисми –2019 йилнинг 1 июлидан, якунийси эса – 2021 йилнинг1 январидан кучга кириши белгиланган. Жумладан, алкоголни дам олиш кунлари сотилишининг тақиқлови 2021 йилда кучга киради.

Шу билан бирга "Хроника Туркменистана" нашрининг хабар қилишича, Туркманистонда алкогол нархи декабрь бошларида оширилган эди. Нашрнинг маълум қилишича, 1 декабрдан бошлаб алкогол ва тамаки маҳсулотларининг акцизлари оширилди.

«Озодлик» мухбирининг сўзларига қараганда, айни дамда Ашхободдаги дўконларда алкогол маҳсулотларининг ассортиментлари хилма-хилдир. "Энг арзон ароқ 13 манат (расмий курс бўйича 4 доллар)дан сотилмоқда, энг қиммат ароқнинг нархи 100 манатгача етган. Аммо ҳамма ҳам уни очиқчасига сота олмайди. Муаммо шундаки, алкогол ичимликларини сотиш учун лицензия олиш жуда ҳам қийин", дея хабар беради 12 декабрь куни Ашхободдаги «Озодлик» мухбири. Унинг сўзларига қараганда, лицензия олишда биринчи навбатда вилоятдаги тадбиркорлар қийинчиликлар билан тўқнаш келади.​

XS
SM
MD
LG