Ош: президентке берилген сый тамактын чуусу

Президент Сооронбай Жээнбековдун Оштогу иш сапарында уюштурулган сый тамактын чуусу эми чыга баштады. Шаардык санэпидстанция кызматкерлери президент баш болгон саясатчыларды жасалма документтүү адамдар тейлегенин айтып чыгышты. Алар жооптуу кызмат адамдары катышкан сый тамакты тейлеген студенттердин санитардык китепчелерин жасалмалаган деп, Ош шаардык СЭСтин башкы дарыгерин айыпташууда. Сейитбек Курбаназаров аттуу кызматкер "Азаттыкка" кайрылып, Оштогу "Динат" аттуу ресторанда президент катышкан сый тамакты тейлеген 87 адамга санитардык китепчелер мыйзамсыз берилгенин билдирди.