Фарғона вилоят ҳуқуқ-тартибот органлари вакили “марҳумнинг айнан калтак зарбидан ўлганига оид суд-тиббий экспертизаси хулосаси ҳали йўқлигини” билдирди.
Бешариқ туман, Дўстлик маҳалла фуқаролар йиғини ҳудудидаги Файз қишлоғида жойлашган 17- умумий ўрта таълим мактабининг 10-синф ўқувчиси Миржалол Зокиров, отаси Дилшод Мадраҳимовнинг иддао қилишича, дарс пайтида ҳарбий таълим ўқитувчиси Мирвоҳид Мардонов калтаклагани ортидан ўлган.
Жорий йилнинг 26 ноябрида ўлган ўқувчининг отаси Дилшод Мадраҳимов «ўғлини уриб ўлдирган ўқитувчи устидан прокуратурага ариза» ëзганлигини айтди.
Фарғона вилоят ҳуқуқ-тартибот органлари вакили “ўқувчи ўлими юзасидан терговгача текширув ўтказилганини" айтди.
Марҳум ўқувчининг отаси эса¸ “мактаб директори ва прокуратура ходимлари ходисани бости-бости қилиб юбормоқчи”, дея ўз хавотирини билдирди.
Мактаб дирекори Сирожиддин Қўчқоровнинг айтишича¸ марҳум Миржалол Зокиров аълочи ўқувчи эди. "Бу воқеа бўлган куни мен малака оширишда эдим. Эшитиб ҳайрон бўлдим. Чунки бу бола аълочи эди. Ўша куни яхши баҳолар олган эди. У синф сардори қилиб сайланган эди. Мен малака оширишдан қайтиб хизмат текшируви ўтказдим. Ҳарбий таълим ўқитувчиси Мирвоҳид Мардонов билан суҳбатлашдим. Ўша куни у дарс қолдирган болаларга жумладан марҳум Миржалолга ҳам танбеҳ берганлигини тан олди. Ўқитувчини кабинетимга обкириб нима бўлди, десам, дарсига қатнашмагани¸ конспектларни ëзмагани учун тергаганлиги, аммо қаттиқ урмаганлигини айтди", деди мактаб директори.
Воқеа гувоҳларидан бири калтаклаш қандай юз берганлигини айтиб берди. "Ўша куни бир неча ўқувчи калтакланди. Устоз бизларни турғазиб қўйиб, "нега дарс қолдирдинг?" деб ëмон гаплар билан сўкди. Миржалолни кўкрагига урганида у нафас ола олмай букчайиб қолди. Эртасига мактабга келмади", деди сухбатдош.
Марҳум Миржалол Зокировнинг отаси тўнғич ўғлининг мактабдан "бир аҳволда" келгани ва нафаси сиқилиб ëтиб қолганини гапиради. "Фарзандимни кўкрагига ўқитувчиси катта куч билан мушт урган. Ўғлим аввалига мендан қўрқиб ҳеч нарса демади. Тушлик пайтида мактабдан келдию ҳушидан кетди. Бешариқ касалхонасига оборсам доктор аллақачон пешонаси музлаб бўлган деди. Беш фарзандим бор эди. Хозир эса тўрттаси қолди. Прокуратурага ариза бердим зўравон ўқитувчига қонуний чора кўрилсин деб", деди ота.
Унинг яна айтишича¸ “қабрни очиб жасадни суд-тиббий кўрикдан ўтказишни” ҳам талаб қилган.
Директорнинг айтишича¸ ҳали расман гумонланувчи сифатида малакаланмаган харбий таълим ўқитувчиси Мирвоҳид Мардонов мактабда дарс бермоқда.