21 яшар Мастона кўргиликлари туфайли уй бекаси бўлишни орзу қилган оддий қишлоқ қизидан кучли аёлга айланганини айтади. Эндиликда унинг ўз олдига қўйган мақсади бор.
Мастона пойтахт Душанбедаги милиция академиясига ўқишга кириб, ўзиникига ўхшаш қисматга йўлиққан келинларга ёрдам беришни истайди. "Кўрган-кечирганларим ёрдамида бошқаларга кўмак берсам бўлади. Менинг бошимга тушган ишлар бошқа кўп қизларнинг ҳам бошига тушган", деди Мастона.
Мастонанинг отаси Асомиддин Жалолов қизи таҳсил олиши учун маблағ тўплашни ваъда қилган.
Мастона куёв уни тўйгача бошқаси билан жинсий алоқа қилишда асоссиз айблаганини айтиб келади. Консерватив тожик жамиятида қизларнинг тўйдан олдин жинсий алоқа қилиши ўта катта гуноҳ ҳисобланади.
Ҳозирда пойтахт Душанбеда истиқомат қилаётган ота ва қиз собиқ куёвни туҳмат ва жинсий зўравонлик учун жавобгарликка тортиш учун курашмоқда.
Жалолов Ҳамадони тумани ҳамда Душанбе шаҳрида 16 давлат идорасига, жумладан, полиция, прокуратура, аёллар ишлари қўмиталари ҳамда маҳаллий ҳукумат идораларига мурожаат қилган.
Жалолов қизига ишонишини, ўз мақсадига эришиш учун охиригача курашишини айтди.
"Бошқа йиғламаслика қарор қилганман. Йиғлаганим етади. Ҳозирча яна оила қуришни режалаштираётганим йўқ. Таҳсил олиб, полиция ходими бўлишни, бошқа аёлларга ёрдам беришни истайман", дейди Мастона.
Мастона тўйгача бокира бўлганини, аммо куёв унга ишонмаганини айтади. Унинг сўзларига кўра, келин-куёв яқинлик қилиши ортидан куёв уни қаттиқ дўппослаб, тўйдан олдин биров билан жинсий алоқа қилганини тан олишни талаб қилган.
Мастона қувилган кун унинг оиласи келинни Душанбега Миллий суд тиббиёти марказига олиб борган. У ерда шифокорлар Мастона тўйи кечаси чиндан бокира бўлганини тасдиқлашган.
Тожикистонда илк маротаба оила қураётган ёшлар мажбурий тиббий кўрикдан ўтиши керак. “Покизалик тести” ихтиёрий, аммо аксар қизлар куёв талаби билан ёки можаронинг олдини олиш учун ушбу тестдан ўтади.
Яқинда БМТ бокиралик тестларини жорий қилган давлатларни “тиббий жиҳатдан кераксиз бўлган” ушбу анъанани бекор қилишга чақирди.