Ссылки доступа

Додгоҳ подполковники милисаи тоҷикро барои “дузанагӣ” 50000 сомонӣ ҷарима кард


Додгоҳи шаҳри Ҳисор як подполковники милисаро ба “дузанагӣ” айбдор ва 50 ҳазор сомонӣ, муодили 5300 доллар ҷарима кард. Ҳукми додгоҳ нисбат ба Санъатулло Саъдуллоев 14 декабри имсол содир шуда, ҳанӯз ба иҷро надаромадааст.

Ҳам подполковник ва ҳам ҳамсари аввали ӯ ва даъвогари аслӣ дар баҳси додгоҳӣ – Малоҳат Азизова – аз ҳукм розӣ нестанд.

Санъатулло Саъдуллоев, подполковники милиса 18 декабр дар суҳбати телефонӣ гуфт, ки барои бозбинии ҳукм ба зинаи болоии додгоҳ шикоят хоҳад бурд. Ӯ эътироф кард, ки воқеан аз соли 2009 то соли 2016 дар як вақт бо ду зан зиндагӣ карда ва ба гуфтааш, ду соли пеш зани дувуми худро талоқ додааст.

Саъдуллоев гуфт, дар муддате, ки “ҷиноят содир шуда буд”, дар Тоҷикистон се дафъа қонуни авф татбиқ гардид ва ӯ бояд “бар асоси ин қонунҳо аз ҷавобгарӣ озод шавад”.

Аммо дар ҳолати татбиқ нашудани қонуни афв нисбат ба Саъдуллоев, ӯ бояд 50 ҳазор сомонӣ ҷарима пардохта, эҳтимол аз ҷои кор ҳам ронда шавад. Дар ин ҳолат, ба гуфтаи ин маъмури милиса, вай имкони пардохти алимент барои шаш фарзанди ноболиғ аз ду ҳамсарро нахоҳад дошт.

“Додситон ва додрас хостанд, хонаеро, ки ба номи падарам аст, барои зани аввалам диҳам ё 50 ҳазор сомонӣ ҷаримаро пардохта, афв шавам. Наметавонам хонаи падарамро, ки худаш бемор аст ва дар онҷо чанд нафари дигар зиндагӣ мекунанд, ба ӯ бидиҳам. 25 сол дар мақомоти милиса кор мекунам ва 15 соли охир дар навбати замин ҳастаму то ҳанӯз хонаи шахсӣ надорам. Айни замон барои пардохти ҷарима ҳам имкон надорам, чун маоши ман танҳо барои роҳкиро сарф мешавад, ки аз Ҳисор ба Ваҳдат рафта меоям”, - афзуд ӯ.

Ин подполковники милиса мегӯяд, зиндагӣ бо ду ҳамсар “иштибоҳ” буд ва аз кардааш “пушаймон аст”. Ӯ дар посух ба суоли Радиои Озодӣ, ки “дониста ба ин кор даст зад?” гуфт: “Вақте зани аввалаам баъди таваллуди фарзанди якум дигар натавонист соҳиби кӯдак шавад ва дар ин мушкил маро гунаҳкор кард, барои исботи худам зани дувум гирифтам. Бо ҳамсари дувум макони муайяни зиндагӣ надоштем. Ӯ дар хонаи шавҳари якумаш маскун шуда буд”.

Малоҳат Азизоваи 40-сола, ҳамсари якум ва қонунии Санъатулло Cаъдуллоев аст, ки бо ӯ ҳабдаҳ сол зиста ва ду фарзанд дорад. Азизова рӯзи 18-уми декабр гуфт, ки набояд шавҳараш бо пардохти ҷарима аз ҷавобгарӣ озод шавад, балки барои ӯ ва ду фарзандаш сарпаноҳ диҳад ва ҳамин тавр то ба балоғат расидани онҳо алимент пардозад.​

“Ман як моиндар дорам ва ҳеҷ вақт бо ду фарзанд, ки алакай мактабхон ҳастанд, дар хонаи падарам ҷой намегирам. Қонун бояд одилона бошад, на ин ки баъди шикоят аз болои шавҳарам ман бехонаву дар монам ва ӯ бо пардохти ҷарима озод шавад. Агар мушкили ман ҳал нашавад, то ба президенти кишвар шикоят мекунам”, - гуфт ӯ.

Ҳамсари дувумими Саъдуллоев – Гулбаҳор Валиеваи 41-сола ҳам ҳафтаи гузашта гуфта буд, ки 6 сол пеш ба никоҳи шариатии Саъдуллоев даромада, ду сол пеш дар пайи ҷанҷоли зани якум талоқ гирифт.

Қонуни ҷиноии Тоҷикистон чандҳамсариро мамнӯъ карда, барои бисёрзанӣ то панҷоҳ ҳазор сомонӣ ҷарима ва ё то ду сол корҳои ислоҳиро пешбинӣ кардааст.

XS
SM
MD
LG