Ссылки доступа

Бурунрафти нирӯҳои ИМА аз Сурия Олмонро нигарон кардааст


Вазири умури хориҷии Олмон Ҳайко Маас 20 декабр гуфт, бурунрафти нирӯҳои низомии ИМА аз Сурия ба муборизаҳо зидди гуруҳи тундрави "Давлати исломӣ" (ДИ) таъсири манфӣ мерасонад.

Ба гуфтаи ӯ, тасмими Кохи сафед мақомоти Олмонро ба ҳайрат овард. Маас афзуд, ки мавқеи тундравон дар Сурия ба таври ҷиддӣ суст шудааст. Вале ба назари ӯ, акнун комёбшавӣ зери хатар аст.

Пештар ҳукумати Фаронса гуфт, ки нирӯҳои худро аз Сурия бароварданӣ нест. Вазири Фаронса дар умури Аврупо Наталӣ Луазо дар телевизиони Cnews бо ишора ба ҳамлаи ахири Страсбург, ки 5 кушта бар ҷой гузошт, гуфт, "мубориза зидди терроризм ҳанӯз ба поён нарасидааст. Сарвазири Исроил Бенёмин Натаняҳу низ аз ин вазъ ибрози нигаронӣ кард.

Бурунрафти нирӯҳои ИМА-ро аз Сурия намояндаи Кохи сафед Сара Сандерс рӯзи чоршанбе эълом кард. Вашингтон тасмим дорад, дар давоми аз 60 то 100 рӯз нирӯҳояшро барорад. Дар Сурия беш аз ду ҳазор сарбози амрикоӣ қарор доранд. Президенти ИМА Доналд Трамп дар паёми видеоии худ бахшида ба бурунрафти нирӯҳо гуфт, эътилофи низомии байналмилалӣ ДИ-ро шикаст дод.

Эътилофи низомии байналмилалӣ ба раҳбари ИМА мубориза бо тундравонро дар Сурия аз соли 2014 оғоз кард. Эътилоф аз нирӯҳои мухолифи демократии Сурия ҷонибдорӣ мекунад.

XS
SM
MD
LG