«Апрель» телеканали директори Дмитрий Ложников ўзининг Facebook'даги саҳифасида сиёсатчилар телеканал ва Атамбаевдан 9 млн сом талаб қилаётганликларини ёзди.
Парламент собиқ спикери Ахматбек Келдибеков «NUR TV» телеканалига берган интервьюсида сўнгги баёноти учун собиқ президент Алмазбек Атамбаевни судга бермоқчи эканлигини айтган эди. «Ўзининг чиқишида у инсон қадр-қимматини ерга урди. Ўз шаънимни ҳимоя қилиш мақсадида мен уни судга бераман. Агар у ўзининг сўзларини судда исботлай олмаса, уни жавобгарликка тортишларини талаб қиламан», -деди Келдибеков.
10 декабрь куни “Апрель” телеканалига интервью берган собиқ президент Алмазбек Атамбаев Ахматбек Келдибековни коррупция билан боғлиқ ишларга аралашиб қолганини айтган эди.
«Одамларни кўзи кўр бўлишини исташмоқда. Ўғирланган ва ҳалол ишлаб топилган пуллар ўртасида фарқ йўқлигини кўрсатишмоқчи. Давлат мансабларида ишлаб мультимиллионерга айланган Келдибековлар ва Тюлеевлар «Атамбаевни ҳибсга олиш керак»! деб бақиришмоқда… Кимни ҳибсга олиш керак? Давлатни ўмариб миллионер бўлганларними, ёки ўз меҳнати билан пул топиб, ота боболари ерида ўзига уй қурганларними? Кўриб турибман, ҳозирги хукумат ўғри ва туҳматчилар билан умумий тил топган кўринади. Ҳатто уларни қўллаб-қувватлаётгани кишини таажжубга солади…», — деган эди собиқ президент.
Декабрда Келдибеков Kyrgyztoday.kg янгиликлар сайтини судга бериб, 1 млн сом (14 минг долларга яқин) даъво қилган эди. Сиёсатчининг фикрича, нашрда эълон қилинган мақола унинг қадр-қиммати ва шаънига зарар етказган.